Aýdandyq ardagerler keńesiniń bastamasymen ótetin is-sharalardyń basy-qasynan ylǵı da ony kórýge bolady. Onyń ústine Serik Balabekov – aýdandyq ardagerler janynan qurylǵan áleýmettik máselelermen aınalysatyn turaqty komıssııanyń tóraǵasy. Áriptesimizdiń abyroıyn asyryp turǵan – onyń uıymdastyrýymen 2019 jyldan beri qaraı Sarykemer aýylynda jumys istep turǵan turmysy tómen azamattarǵa áleýmettik arnaıy qyzmet kórsetetin ortalyq. Osy ortalyqty ózi júgirip júrip ashyp, onyń jumysyn jolǵa qoıyp, búginde halyqtyń rızashylyǵyna bólenip júr.
S.Balabekov – elgezek, kóppen til tabysyp ketetin belsendi azamat, sózge sheshen, iske kelgende tııanaqty. Bizdiń aýdanymyzdyń búgingi tańdaǵy bataly qarııalarynyń biri. Jalpy, ol – Sarysý aýdanynyń týmasy. Sol aýdannyń Jaıylma aýylynda dúnıege kelgen, balalyq shaǵy sonda ótken. Almatydaǵy Abaı atyndaǵy Qazaq pedagogıkalyq ınstıtýtyn tarıh pániniń muǵalimi mamandyǵy boıynsha bitirgen. Eńbek jolyn qurylysshy bolyp bastaǵan ol odan keıingi jyldarda komsomol qyzmetinde bolǵan. Sarysý aýdandyq atqarý komıtetinde jaýapty qyzmette keńshar dırektorynyń orynbasary, keńshar kásipodaq komıtetiniń tóraǵasy qyzmetterin de atqarypty. Táýelsizdik alǵan alǵashqy jyldarda jeke kásipkerlikpen de aınalysypty. El qala mańaıyna údere kóship jatqan toqsanynshy jyldarda otbasymen Baızaq aýdanyna kóship keledi.
Kópshil, úlkenniń de, kishiniń de tilin taba biletin Sekeń bótenmin demeıdi, tez úırenisip ketedi. Ártúrli salada eńbek etip, baǵyn synap kóredi. Qaı jerde júrse de eńbegi jemisti, tabysty bolady. Abyroıy artyp, eldiń alǵysyna bólenedi. 2011 jyly zeınet demalysyna shyqqannan keıin S.Balabekov zamandasymyzdyń ekinshi tynysy ashylǵandaı boldy. Zeınetkermin dep qarap otyrmaı, aýdandyq ardagerler keńesiniń jumysyna belsene qatysa bastaıdy, osynda turaqty komıssııanyń tóraǵasy bolyp bekitiledi.
Ol kisiniń atqaryp júrgen qoǵamdyq jumystaryn sanamalaıtyn bolsaq, saýsaq jetpeıtindeı jaǵdaıda. Sekeń birde polısııanyń qoǵamdyq kómekshisi bolsa, endi birde aýdandyq ákimdik janynan qurylǵan monıtorıngtik toptyń múshesi retinde halyqtyń muńyn muńdap júrgenin kórýge bolady. Sekeń qaıyrymdylyq aksııalaryn uıymdastyryp, el-jurttan tutynǵan kıimderdi jınaqtap, óziniń ortalyǵy arqyly muqtaj jandarǵa taratyp, saýabyn alyp jatqanyn kórgende, eriksiz rıza bolasyń. Ol aýdandyq tarıhı-ólketaný mýzeıine de arnaıy baryp, jádigerlermen tolyǵýyna atsalysyp júredi. Prezıdent Qasym-Jomart Toqaevtyń atyna arnaıy hat joldap, on birinshi nemeresine esimin qoıý úshin ruqsatyn alyp, Qasym-Jomart esimin bergen azamat. Búginde osy nemeresi – mekteptegi zerek te úzdik oqýshynyń biri.
Qoǵamdyq qyzmette birge júrgendikten ony «Qoly da ashyq, joly da ashyq bizdiń Serik» dep maqtanyp aıtyp otyramyz. Aqsaqaldyq jasqa qadam basqan áriptesimiz qashan kórseń de qaınaǵan qoǵamdyq tirshiliktiń ortasynda júredi. Respýblıkalyq, oblystyq, aýdandyq gazetterdi úıine arnaıy jazdyryp, basqa da turǵyndarǵa baspasózge jazylýdy nasıhattaýdan sharshaǵan emes. Ol – jubaıy Almabekova Janna ekeýi tárbıelep ósirgen 7 balasynan 15 nemere súıip otyr.
Tóle NARJANOV,
Baızaq aýdandyq bıler
keńesiniń tóraǵasy
Jambyl oblysy
