Oblys ákiminiń orynbasary Jasulan Bısembıevtiń aıtýynsha, keıingi eki jylda jasandy jolmen 34 sábı ómirge kelgen. Alaıda bedeýlik belgisimen áli de 1 345 otbasy esepke alynǵan.
«Ańsaǵan sábı» baǵdarlamasymen ómirge kelgen sábıdiń biri bes aıdan beri aýrýhanada jatyr. Jaqynda shaqalaq perınataldyq ortalyqtan oblystyq balalar aýrýhanasyna aýystyryldy. Onyń ómirge kelgen kezdegi salmaǵy – 503 gramm, al boıy 28 santımetr bolǵan. Eń jeńil salmaqtaǵy bul sábı otbasynyń tuńǵyshy eken.
«Mundaı jeńil salmaqtaǵy sábı shala týǵandar sanatyna alynady. Oblystyq perınataldyq ortalyqtyń dárigerleri bes aıdan beri sábıge qarqyndy em-dom júrgizdi. Osy kezge deıin onyń salmaǵy 2 kılo 500 gramǵa jetti. Jaqynda shaqalaq odan ári júrgiziletin em-dom sharalaryn jalǵastyrý úshin oblystyq balalar aýrýhanasyna aýystyryldy. О́ıtkeni onyń ókpesi kishkentaı bolǵandyqtan, oǵan áli de SRAR tútikshesiz apparatymen ottegi berý qajet», dep habarlady perınataldyq ortalyqtyń baspasóz qyzmeti.
Bul náresteniń ata-anasy EKU ádisine bes ret júginipti. Úmit úzbegen olar bıyl «Ańsaǵan sábı» baǵdarlamasymen taǵy da sábı súıýge bekingen.
«Otbasymyzdyń basty armany – sábı súıý. Bıyl júktilik sátti ótip jatqan edi. Alaıda densaýlyǵyma baılanysty júktiliktiń 22-aptasynda egiz sábıdi bosanýǵa týra keldi. Egizdiń syńary tórt saǵattan soń shetinedi. Endi osy qyzymnyń amandyǵyn tilep otyrmyn», deıdi sábıdiń anasy Anargúl.
О́ńirde týý kórsetkishiniń artqany baıqalyp otyr. Máselen, byltyr Atyraý oblysynda 11 myń 133 sábı ómirge kelgen. Al bıyl segiz aıda olardyń sany 10 913-ke jetti.
Bıyl týǵan balalardyń deni Atyraý qalasynda tirkelgen. Munaıly shaharda 9 052 náreste dúnıe esigin ashqan. Al 1 014 sábı Jylyoı aýdanyndaǵy ata-analaryn qýanyshqa bóledi. Al Qurmanǵazy aýdanynda shaqalaqtar qatary 324-ke kóbeıgen. Nárestelerdiń sany Maqat aýdanynda – 165, Inderde – 163, Qyzylqoǵada – 89, Mahambette – 68, Isataı aýdanynda 38-ge artty.
Atyraý oblysy
