Kezdesý barysynda oblys ákimi N.Uranhaev aımaqtaǵy túıtkildi máselelerdi oń sheshýde Joldaýdan týyndaıtyn mindetter men osy baǵytta atqarylyp jatqan jumystarǵa toqtaldy. О́z kezeginde B.Izmuhambetov ótken jyly Prezıdent Jarlyǵymen úsh oblysta ardagerler uıymynyń fılıaldary qurylyp, Qonaev jáne Jezqazǵan qalalarynda arnaıy ardagerler ortalyǵy ashylǵanyn atap ótti. Jıynda depýtat osyndaı ortalyqtyń Semeı qalasynan ashylýyna jaǵdaı jasap, ardagerlerge ǵımarat bólip, kómek kórsetkeni úshin oblys ákimine rızashylyǵyn bildirdi.
Sapar barysynda B.Izmuhambetov aqyn Abaı, Shákárim, Muhtar eskertkishterine baryp, qalanyń tarıhı-mádenı oryndaryn aralady. Oblystyq ardagerler keńesi ortalyǵynyń ashylý saltanatyna qatysqan depýtat Abaı eliniń ardagerlerimen de júzdesti.
«Aldymen sizderdi qazaqqa Abaı, Shákárim, Muhtar Áýezov sııaqty birtýar perzentterdi syılaǵan ulylar mekeniniń burynǵy mártebesin qaıtaryp, Abaı oblysy bolyp qaıta qurylýymen quttyqtaımyn. Bul meken – talaı Alash arystarynyń izi qalǵan qasterli óńir. Memleket tarapynan ardagerlerge barlyq jaǵdaı jasalyp jatyr. Prezıdent bıylǵy Joldaýynda álemde geosaıası ahýal ýshyǵyp turǵanyn, adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastalǵanyn aıtty. Eldik isterde aǵa býynǵa túser júk salmaqty. Ardagerlerimiz el tynyshtyǵy, yntymaǵy jolynda, Memleket basshysynyń bastamalaryn qoldaýda qoǵamdyq jumystarǵa belsendi aralasyp keledi. Internet damyǵan qazirgi ýaqytta túrli teris pıǵyldaǵy aǵymdar kóbeıip ketti. Osy jaǵynan saq bolyp, jastarǵa durys baǵyt-baǵdar kórsetýimiz kerek», dedi ardagerler ortalyǵynyń ashylýynda sóz sóılegen B.Izmuhambetov.
Depýtat ardagerlerdiń aralasýyn qajet etetin máselelerdiń kóp ekenin, qoǵamda bolyp jatqan ózgeristerdi elge durys jetkizýdiń mańyzdylyǵyn da atap ótti. Sóz sońynda Májilis depýtaty ardagerlerdi Qarttar kúnimen quttyqtap, qoǵamdyq jumystarǵa belsendi aralasyp júrgen ardagerlerge ardagerler uıymynyń «Qurmetti ardager» tósbelgisi men Qurmet gramotalaryn tapsyryp, jumystaryna sáttilik tiledi.
