Ǵasyr jasaǵan gazettiń mereıtoıy atalyp ótip, burynǵy ǵımaratyna, ómirden ótken qyzmetkerleri turǵan úılerge eskertkish taqta ornatyldy. Birneshe qyzmetkerdiń esimi kóshege berildi. О́ńirdegi basylymdardy biriktirip otyrǵan «Atyraý-Aqparat» JShS ǵımaratynda gazet mereıtoıyna arnalǵan kórme uıymdastyryldy. Kórmege basylymnyń bir ǵasyrlyq belesinen syr shertetin jádigerler toptastyryldy. Al «Qalam ushyndaǵy ǵasyr» atty saltanatty keshte 100 jyldyq tarıhı shejire teatrlandyrylǵan kórinispen árlendi.
«Bir ǵasyr buryn «Erik» ataýymen jaryqqa shyǵyp, qoǵamdyq damýdyń ár kezeńine saı oqyrmanyna tushymdy maqalalar, óńirdiń máselesi men jetistigin jarııa etken gazettiń tarıhy áli jalǵasady. Bul gazette tek jergilikti qalamgerler emes, ult ádebıetine mol mura qaldyrǵan Asqar Toqmaǵambetov, Zeınolla Qabdolov, Farıza Ońǵarsynova, Ábish Kekilbaev sekildi jazýshylardyń qoltańbasy bar. Osy kezeńde birneshe býyn almasty. Gazet ujymy udaıy oblys turǵyndarynyń muń-muqtajyn joqtap, ar-namysyn qorǵady. Turǵyndardyń áleýmettik máselesin batyl kóterip keledi», dedi oblys ákimi Serik Shápkenov.
Gazet ujymyn mereıtoıymen quttyqtaýshylar legi az bolmady. Memlekettik keńesshi men Premer-mınıstr quttyqtaý hat joldady. Ásirese Astana men Almatydan, Qyzylorda men Aqtaýdan arnaıy quttyqtaýǵa kelgen áriptesterdiń orny bólek. Buryn «Atyraý-Aqparat» medıaholdıngine jetekshilik etken, qazir «Qazaq gazetteri» JShS bas dırektorynyń orynbasary Erbolat Qamen men «Aıqyn-Lıter» JShS dırektory Ysqaq Egemberdıevtiń júrekjardy quttyqtaýy basylym qyzmetkerlerine serpin berdi. Sondaı-aq «Alataý aqparat» JShS bas dırektory Erjan Qalymbaıuly, «Syr-medıa» JShS Amanjol Ońǵarbaev, «Mańǵystaý Medıa» JShS dırektory Gúlmıra Ábisheva quttyqtady.
Bul kúni gazet qyzmetkerleri marapatqa ıe boldy. Bir toby «Aqparat salasynyń úzdigi» tósbelgisimen, endi bir shoǵyry Senat pen Májilis tóraǵalarynyń alǵys hatymen marapattaldy. Bir top tilshige oblys ákiminiń alǵys haty berildi.
Atyraý oblysy
