Festıvalde 6 sheteldik jáne 8 qyrǵyz teatry baq synady. «ART ORDO – 2023» halyqaralyq teatr festıvaline ár elden teatr qaıratkerleri men teatr zertteýshileri shaqyryldy. Halyqaralyq qazylar alqasyn Qazaqstannyń halyq ártisi, Memlekettik syılyqtyń laýreaty, Jastar teatrynyń kórkemdik jetekshisi, professor Nurqanat Jaqypbaı basqardy. Sonymen qatar qazylar alqasynyń quramynda О́zbekstannyń Halyq ártisi, О́zbekstannyń Ulttyq akademııalyq drama teatrynyń aktrısasy Gaýhar Zakırova, Qyrǵyz Respýblıkasynyń Halyq ártisi, Qazaqstannyń eńbek sińirgen ártisi, aktrısa Gúlsara Ájibekova, Ázerbaıjannyń Halyq ártisi, Ázerbaıjannyń eńbek sińirgen mádenıet qaıratkeri, teatr jáne kıno akteri, rejısser Djahangır Mýtallıb ogly Novrýzov, Qyrǵyzstan Teatr qaıratkerleri odaǵynyń prezıdenti, ónertaný kandıdaty Janysh Qulmambetov, teatr synshysy, ónertaný kandıdaty Aısulý Saǵıtova (Bashqurtstan, Reseı), teatr synshysy jáne rejısseri Ismaıl Dıkılıtash (Túrkııa) boldy.
Halyqaralyq qazylar alqasy «Úzdik qoıylym» – bas júlde, «Úzdik rejısser», «Úzdik ssenografııa», «Úzdik er adam róli», «Úzdik áıel adam róli», «Ekinshi plandaǵy er adam róli», «Ekinshi plandaǵy áıel adam róli», «Synshylar kózaıymy» atalymdary boıynsha júldegerlerdi anyqtady.
Qyrǵyzstan kórermeni Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń spektaklin zor yqylaspen qabyldady. Sahnada akterlerden basqa, orkestr de óner kórsetti. Bul dramalyq shyǵarmanyń áserin arttyra tústi. Halyq aspaptar orkestri barlyq mýzykalyq partııalardy jandy mánerde oryndap, spektaklge ózgeshe sıpat berdi. Sahnada eski zaman hıkaıasy zamanaýı áýenmen órbip otyrdy. Tipti Maıkl Djeksonnyń ánderinen de úzindi oryndaldy. Osylaısha, avtor klassıkalyq qur baıandaýdan bas tartyp, Qozy Kórpesh pen Baıan Sulýdyń mahabbat hıkaıasyn zamanaýı tásilde jetkize bilgeni úshin Qallekı teatrynyń ujymy Ǵ.Músirepovtiń «Qozy Kórpesh – Baıan sulý» spektakli úshin Gran-prı júldesimen jáne TÚRKSOI Halyqaralyq túrki mádenıeti uıymynyń arnaıy syılyǵymen marapattaldy.
Qoıýshy rejısser – Gúlnaz Balpeıisova, dırıjer – Maraljan Myrzaqulova, qoıýshy sýretshi – Qanat Maqsutov, kıim sýretshisi – Alma Syrbaeva, horeograf – Ilmıra Imanǵazına, kompozıtor – Oleg Sınkın.
Spektaklde Qazaqstannyń eńbek sińirgen qaıratkeri A.Nógerbek, «Daryn» Memlekettik jastar syılyǵynyń laýreaty J.Erbolat, «Serper» syılyǵynyń laýreattary – Sh.Ordabaev, O.Jaqypbek, aktrısa A.Jetpisbaeva, akter N.Esen, M.Namenov, B.Shalqar, S.Anvarova, B.Qalıla, A.Mamyr, Á.Bektas, M.Makıbaeva jáne halyq aspaptar ansambli óner kórsetti.
