Kóshpeli halqymyz ala qorjynmen as-sýyn alyp júrse, Máshhúr Júsip atamyz saparlaı qalsa janynan tastamaıtyn qorjynnan qoljazbalary men kitaptary úzilmegen. Ǵulamanyń teri sińgen kóne qorjynyna kezinde talaı marjan dúnıelerdiń teńdeı salynǵany anyq. Al tis tazalaǵyshy da qyzyq jádiger. Erekshe qatty aǵashtan jasalǵan, uzyn boıyna tiligi bar. Baıanaýyl jerinde tuzdy kólder jetkilikti, sol kezdegi adamdar tis pastasynyń ornyna tuzdy kólderdiń jaǵasyna jınalatyn mıneraldy tozańdy paıdalanǵan eken.
«Tashkent, Buhara, Samarqanǵa barǵan saparlarynda Máshhúr atamyz tis tazalaýǵa arnalǵan quraldy, qazirgi tis shetkalarynyń túp beınesin kórip satyp alǵan, ózi de qoldanǵan, jurtqa da usynǵan. Osylaısha, ol qazaqtardy basqa halyqtarda bardy úırenýge shaqyrǵan. Atamyz aǵartýshylyq qyzmetpen de aınalysqan. Muraǵa qalǵan zattary arqyly qasıet ıesiniń tylsym syry men áýlıeligin áıgileý maqsat etilýde. Jalpy, osy ýaqytqa deıin bizdiń qoǵam Máshhúr Júsip Kópeıulyn ǵalym, oqymysty retinde ǵana tanyp kelgen edi» deıdi Máshhúr Júsip Kópeevtiń shóberesi, aqynnyń memorıaldyq murajaıynyń basshysy Áset Pazylov.
Kózi tirisinde Qurannyń nebir túrin ustaǵan ǵulamanyń áıgili kók Quranyn, ókinishke qaraı, kórmeden kóre almadyq. Máshhúr Júsip ómirinde jalǵyz ǵana sýretke túskenin, oǵan sebepshi bolǵan dosy Ábdirazaq Allajaruly bolǵanyn aıtýymyz kerek. Sol sýrette atamyzdyń shapanynan Quran kitaptyń sheti shyǵyp turǵanyn ańǵarýǵa bolady. Kerekýlik fotograf Dmıtrıı Bagaev sýretke túsirip jatqanda ǵulama «Ielerim shoshıdy» dep, qurandy keýdesine basyp qoıǵan. Murajaı qyzmetkerleriniń aıtýynsha, ol Quran kitap ta Eskeldidegi murajaıda saqtaýly tur.
Aıtyp óteıik, bul kúnderi Buqar jyraý atyndaǵy ádebıet jáne óner mýzeıinde Máshhúr Júsip Kópeıulynyń 165, Sultanmahmut Toraıǵyrovtyń 130 jyldyǵyna arnalǵan «Babalar murasy» atty taqyryptyq kórme jumys istep tur.
PAVLODAR
