Izgilik oıy bir arnaǵa toǵyssyn

Adamzat tarıhy dinı qaı­shylyqtar saldarynan kóptegen qaq­tyǵystyń, sonyń ishinde soǵystardyń kýágeri boldy. Shyndyǵynda, «din» jáne «janjal» sózderi bir-birimen úıles­­peıdi. Ár din yntymaq, birlik, baýyr­maldyq qundylyqtaryn úıretse, onda daý-damaıǵa oryn joq. Din ózektiligin joǵaltpasa, onda túrli nanymdaǵy adamdar bir-birinen alshaqtaýdyń ornyna, ortaq izgilik qun­dylyǵyna súıenip, ózara aralasatyn kópshil qoǵam qurýǵa úles qosýy kerek.

Konfessııaaralyq jáne órkenıet­aralyq dıalogti damytý ortalyǵy adamdardy jaqyndastyrý jolynda eleýli jumys atqaryp keledi. 2022 jyl­dyń qyrkúıeginde Qazaqstanda ótken Álemdik jáne dástúrli dinder kóshbasshylarynyń VII sezi kon­fessııaaralyq úndestik, jahandyq aýqym­daǵy yntymaqtastyqty da­mytýdaǵy mańyzdy kezeń boldy. Bul mártebeli is-shara qazirgi zamannyń ózekti máselelerin sheshý, tatýlyqta ómir súrýdiń tásilin zertteýge rýhanı kóshbasshylardy, yqpaldy saıası qaıratkerlerdi jáne halyqaralyq uıymdardyń ókilderin jumyldyrady.

Indýızm ókili retinde Hatshylyq pen Jumys tobynyń múshesi bolyp Kon­greske qatysý jeke tulǵa retinde tá­jirıbemdi keńeıtti. Meniń uıymym – Somaııa Vıdıavıhar ýnıversıteti (Mýmbaı, Úndis­tan) Qazaqstannyń konfessııaaralyq dıalog ortaly­ǵynyń kúsh-jigerin únemi qoldap keledi. Somaııa Vı­dıavıhardyń bu­rynǵy vıse-prezıdenti, doktor Shant­ılal Somaııa 2003, 2006, 2009 jyldary Qazaqstan memleketi uıym­das­tyrǵan Álemdik jáne dástúrli din­der­diń halyqaralyq sezine úndi dele­­gasııasynyń jetekshisi retinde shaqyryldy.

Qazirgi ýaqytta Somaııa Vıdıavıhar ýnıversıtetiniń kansleri Samır Somaııa – Kongrestegi ındýızm dele­gasııasynyń jetekshisi. Jaqynda, 2023 jyldyń 7 tamyzynda Somaııa Vıdıavıhar ýnıversıteti Mýmbaıda Qazaqstan tarapymen birlesip, je­tinshi Kongress Deklarasııasyn tal­qylaý maqsatynda dóńgelek ústel uıymdastyrdy. Konferensııaǵa orta­lyqtyń tóraǵasy Bolat Sársenbaev qatysty. Sondaı-aq kóptegen kórnekti ǵalym men din kóshbasshysynyń qaty­sýymen uıymdastyrylǵan bul dóńgelek ústel óte sátti ótti.

Rýdraksha SAKRIKAR,

Somaıa Vıdıavıhar ýnıversıtetiniń konfessııaaralyq qatynastar jáne ózara túsinistik baǵdarlamasynyń hatshysy