Foto: boxingkazakhstan
Hanchjoýdaǵy jazǵy Azııa oıyndaryndaǵy bassyzdyq bokstan bastaldy. Ásirese tóreshilerdiń jartylaı fınaldyq jekpe-jekte Aslanbek Shymbergenovti japon boksshysy Sevon Okazavaǵa jyǵyp bergeni daý týdyrdy. Qazylardyń belden basqan bassyzdyǵyna qatysty Qazaqstan boks federasııasynyń prezıdenti Keńes Raqyshev málimdeme jasady.
«Bokstan álem chempıony, ulttyq quramanyń kapıtany Aslanbek Shymbergenovtyń japon boksshysyna qarsy jartylaı fınaldyq aıqasta tóreshilerdiń ádiletsiz sheshim shyǵarǵany janymyzǵa batty. Aslanbek úsh raýnd boıy andaǵaılap shabýyldady, baryn salyp tópeledi. Soqqylary da dál tıip jatty, qaı qyrynan alǵanda da qarsylasynan basym túsip edi. Biraq tóreshiler sheshimimen rıngtegi referı Okazavanyń qolyn kóterdi. Buǵan deıin de basynan daý arylmaǵan bokstyń aınalasyndaǵy shýǵa qatysty, tóreshilerdiń tizege basýyna baılanysty Halyqaralyq boks qaýymdastyǵyna (IBA) Halyqaralyq olımpıada komıteti (HOK) az shaǵymdanbap edi. Jazǵy Azııa oıyndarynda HOK-tiń ózi soraqy áreketke bardy. Hanchjoýdaǵy jazǵy Azııa oıyndarynyń jartylaı fınalynda tóreshiler tym shekten shyǵyp, sanaǵa syımaıtyn sheshim qabyldady. Mundaı bassyzdyqqa baılanysty Qazaqstan boks federasııasy HOK-tiń tóreshilerine qarsylyǵyn resmı joldaıdy. Jerebeni de ózderine ońtaıly etip burmalady, kil myqtylardy bir topqa tastap, ózderiniń jaqtasqan boksshylarynyń jolyna «qyzyl kilem» tósegendeı bolysty. HOK ótkizetin mundaı saıystarda tóreshilerdiń sheshimine eshqandaı shaǵym qabyldanbaıdy. Qazaqstan qaı kezde de bokstyń derjavasy sanalǵan el. Biz mundaı bassyzdyqqa kelise almaımyz. Bizdiń kapıtandy osylaı aıaqtan shalsa da syndyra almaıdy. Ol budan da mańyzdy dodalarda kók týymyzdy jelbiretetinine senemin», dedi Keńes Raqyshev.
Bokstan ulttyq qurama kapıtany Aslanbek Shymbergenovtiń jartylaı fınalda súringen aıqasyna qatysty bas bapker Myrzaǵalı Aıtjanov ta pikir bildirdi. «Aslanbek baryn saldy, tóreshiler jeńisti bermedi. Qarsylasy da ońaı boksshy emes, álem chempıony», dedi M.Aıtjanov.
Boks sportynyń basynda bul kúnde alaǵaı da bulaǵaı zaman ornap tur. Tóreshilerdiń bura tartýy, jekpe-jekterdiń satylýy, saıasattyń salqyny da az tıip jatqan joq. Tipti bir kezde ǵasyrlyq tarıhy bar boksty jazǵy Olımpıada oıyndarynyń sanatynan syzyp tastaý kerek degen másele de dúrkin-dúrkin kóterildi. Bas bapker Aıtjanov Myrzaǵalı myrza Qytaıǵa attanarda «bizge júktelgen mindet – tórt joldama ıelený», dep edi. Úmit aqtalmady, maqsat oryndalmady.
