«Jas daryn» mamandandyrylǵan mektep-lıseıinde qazaq tili men ádebıeti pániniń muǵalimi bolyp eńbek etetin Sándigúl Ermuratqyzy tárbıelegen oqýshylardyń jetken jetistikterine kóz toıady. Ustaz eńbegi oqýshynyń oqýdaǵy úlgerimimen, bilim salasyndaǵy tabystarymen ólshenetini málim. Tek oblystyq baıqaýlardy bylaı qoıǵanda, keıingi eki jylda onyń shákirtteri arasynan Q.Bitibaeva atyndaǵy respýblıkalyq olımpıadanyń oblystyq kezeńiniń jeńimpazy, ekinshi oryn ıegeri, respýblıkalyq Ábish oqýlarynyń, respýblıkalyq pán olımpıadalarynyń júldegerleri shyqty. Pedagog onymen shektelmeı, óńirdegi qazaq tili men ádebıeti páni muǵalimderiniń shyǵarmashylyq tobymen birlesip, «Olımpıadaǵa daıyndyq» jınaǵyn qurastyryp, oqýshylardyń oqý saýattylyǵyn arttyrýdyń ádis-tásilderi týraly is-tájirıbesimen bólisti. Respýblıkalyq merzimdi basylymdarda túrli taqyrypta maqalalary jarııalandy.
Ustazdyń aıtýynsha, búginde oqýshylardyń jan-jaqty jetilýine, sapaly bilim alýyna barlyq jaǵdaı jasalǵan.
«Balalardyń kókiregindegi bilim sáýlesin jaǵý, oqýǵa degen qyzyǵýshylyǵyn arttyryp, boıynda senimdilik uıalatý ár muǵalimniń mıssııasy bolsa kerek. Oqýshynyń darynyn ashyp, talpyndyrý úshin oǵan jeńistiń dámin sezdirý mańyzdy. О́zine senimdi bola túsken jasóspirim jaqsy baǵyt alyp, sózi de nyqtala túsetinin baıqaımyz. Osy ýaqytqa deıin túrli respýblıkalyq baıqaýlar men olımpıadalarǵa 10-nan asa oqýshym qatysyp, júldesiz qaıtqan emes. Bilim dodalarynyń qaı-qaısysy bolsyn jas urpaqty zerdeli bolýǵa, ulttyq salt-dástúrimizdi tereńirek meńgerip, bilimdi bolýǵa jeteleıdi. Mysal úshin kitap oqý baıqaýy, Abaı shyǵarmalary, salt-dástúr, ulttyq qundylyqtar boıynsha jyl saıyn túrli saıystar ótedi. Oqýshylardyń kitap oqýǵa degen yntasyn arttyrý úshin búginde mektebimizde ár sabaq aldynda 5 mınýt kitap oqytamyz. Olardyń zeıinin kitaptaǵy bilimge aýdarý yjdaǵattylyqty qajet etedi. Sebebi búgingi balalar túrli gadjetterge, ınternettegi oıyndarǵa qumartyp turatyny belgili. Bilim álemine qyzyqtyrý úshin túrli ádis-tásilderdi qoldanamyz. Shyndap kelgende, oqýshylardyń boıyndaǵy enjarlyq pen jalqaýlyqty, erinshektikti jeńýde búginde pedagogter qaýymy úlken sharýalar atqaryp otyr», deıdi S.Ahanbaeva.
Shákirtteriniń aldy búginde joǵary oqý oryndaryn támamdap, túrli salada eńbek etip júr. Sonyń biri – oblys ortalyǵyndaǵy mektepterdiń birinde qazaq tili men ádebıetinen sabaq beretin Inga Gross. Ulty nemis bola tura, memlekettik tildi jetik meńgergen pedagog Abaı, Maǵjan oqýlarynda júldeniń aldyn bermeıdi.
PAVLODAR
