Is-sharaǵa Tótenshe jaǵdaılar mınıstri Syrym Sháriphanov, kórme keıipkerleri, azamattyq qorǵaý organdarynyń qyzmetkerleri, qala turǵyndar qatysty. S.Sháriphanov óziniń quttyqtaý sózinde ótkizilip jatqan fotokórmeniń mańyzdylyǵyn atap ótip: «Bul jobany qolǵa alýdaǵy maqsat – TJM qyzmetkerleri kúndelikti oryndaıtyn qıyn jumysyn dáripteý. Bizdiń qyzmetkerlerdiń árqaısy úshin onyń batyrlyǵyna, erligine jáne eren eńbegine berilgen baǵa mańyzdy», dep ımıdjdik jobany uıymdastyrýshylarǵa alǵysyn bildirdi.
Kórme «Rizamyz» áleýmettik jobasy aıasynda jyl saıyn atap ótiletin kásibı mereke 19 qazan – Qutqarýshylar kúni qarsańynda uıymdastyrylyp otyr.
«Qutqarýshylar basqa adamdardyń ómirin aman saqtap qalý úshin bastaryn qaýipke tigedi, sondyqtan olar erekshe alǵys pen qurmetke laıyq. Kún saıyn biz olardyń otpen, zilzalamen, sýmen arpalysyp, erlik jasaǵandary týraly estımiz, biraq olardyń esimderi men júzderi árqashan ekrannan tys qalady. Sondyqtan «Rizamyz» áleýmettik jobasyn aıasyndaǵy kezekti kórmemizdi osy mamandyqqa, olardyń kásibı merekesi – Qutqarýshylar kúnine oraı uıymdastyrýdy jón kórdik», deıdi «BI Group» holdınginiń basqarma tóraǵasy Ashat Omarov.
Jalpy kórmege kelýshilerge QR kody bar 112 portret usynylady. Olar – dúleı zilzala, apattar jáne basqa tótenshe jaǵdaılar kezinde adamdarǵa táýlik boıy kómekke kelgen qutqarýshylar. QR kodty skanerleý arqyly fotodaǵy qutqarýshylar týraly, olardyń jasaǵan erlikteri jaıly málimetpen tanysýǵa bolady. Bul portretter – kún saıyn ózderiniń kúrdeli, biraq osyndaı mańyzdy qyzmetin atqaratyn azamattyq qorǵaý organdarynyń barlyq 29 myń qyzmetkeriniń ujymdyq beınesi.
Kórmeniń ortasynda QR kody bar qara taqtaısha ornalastyrylǵan. Osy kod arqyly rizamyz.com saıtyna ótip, óz ómirin azamattyq qorǵaý organdarynda arnap, óz mindetterin atqarý kezinde erlikpen qaza tapqan 11 qutqarýshynyń ómir tarıhymen tanysýǵa bolady. Mundaǵy derek boıynsha elimizde táýelsizdik jyldarynda 413 myńnan astam adam qutqarylǵan.
Kórmeniń saltanatty ashylý barysynda LED-ekranda qutqarýshylardyń kúndelikti qyzmeti týraly ımıdjdik beınerolık kórsetildi. Kórme 20 qazanǵa deıin jalǵasady.
