Oblys ákimi Nurlybek Nálibaev aımaqtyń 85 jyldyq mereıtoıy men qala kúni aıasynda esigin aıqara ashqan jańa ǵımarat aldynda jas jubaılardy quttyqtap, mereke kúnderi qalada ásem ǵımarattar men kóz tartar kórkem alleıalar tartý etilgenin atap ótti.
– Biz úshin bul ortalyqtyń mańyzy óte zor. Jyl saıyn óńirimizde shańyraq qundylyǵyn qadir tutqan úıelmender sany artyp keledi. Bıyl Otbasy kúni qarsańynda Astana tórinde 10-shy ret ótken «Mereıli otbasy» ulttyq baıqaýynda jerlesimiz, ǵasyr jasaǵan maıdanger Qabaq Smaǵul áýleti laýreat atandy. Biz osyndaı ónegeli áýletterdi maqtan tutyp, jastarǵa úlgi etemiz. Jańa ómirdiń jarqyn baspaldaǵyna aınalar saraıda rýhanı kemeldengen jańa býyn qalyptastyrýǵa jaǵdaı jasalady, – dedi aımaq basshysy.
Jıynda jańa nysandy sapaly salyp, merziminde tapsyrǵan «Avangard» JShS ókilderine qurmet kórsetildi. Otbasylyq ómirge jańa qadam basqan jas jubaılar lebizin bildirip, «Mereıli otbasy» ulttyq baıqaýynyń laýreaty, ǵasyr jasaǵan abyz aqsaqal Qabaq Smaǵulov bata berdi.
Jańa nysanda neke qııýdan bólek Jastar densaýlyǵy, «Anaǵa taǵzym» ortalyqtary, Otbasy banki, «Baqytty otbasy» jumyspen qamtý ortalyǵy qyzmet kórsetip, jastardyń jubaılyq ómirge beıimdelýine, densaýlyǵyn saqtaýyna, jumyspen qamtylýyna, turǵyn úıge kezekke turýyna, ulttyq salt-dástúrli qundylyqtaryna qanyǵýyna qoldaý tanytady.
Aımaq mereıtoıy aıasynda osy kúni «Anaǵa taǵzym» ortalyǵy el ıgiligine tabystaldy. Ulttyq qundylyqtarymyzdy qadirlep, dástúrimiz dáripteletin ortalyq belgili kásipker Marat Dúısenbaevtyń demeýshiligimen boı kóterip otyr. О́ńir basshysy 1,7 mlrd teńge jumsap, osyndaı ǵajap ǵımarat tartý etken mesenatqa Syr jurtshylyǵy atynan alǵys aıtyp, Qyzylorda oblysynyń Qurmet gramotasyn tabystady. Eńbek ardagerleri Daırabaı Ysqaqov, Alma Baqtııarova, Ázııa Qystaýbaeva jerlesterin jańa ortalyqtyń ashylýymen quttyqtap, T.Júrgenov qorynyń tóraǵasy Sápen Ańsat bata berdi.
Memleket basshysy Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda ekonomıkany órkendetýge jáne halyqty jumyspen qamtýǵa yqpal etetin taǵy bir baǵyt – kreatıvti ındýstrııany jan-jaqty damytýdy júktegeni belgili. Osyǵan baılanysty «Anaǵa taǵzym» ortalyǵy ǵımaratynan «Áıelderdiń kreatıvti ındýstrııa ortalyǵy» jumysyn bastaıdy. Munda jańasha ulttyq brendter qalyptastyryp, eksportty damytýǵa úles qosatyndar shoǵyrlanyp, jańa jumys oryndarynyń ashylýyna jaǵdaı jasalmaq. Jańa ǵımaratta «Mıras» ájeler klýby, «Ult jaquty» mýzeı zaly, «Boıtumar» qyzdar klýby, «Syrǵalym» syrlasý klýby, jas otbasylardyń «Jas otaý» mektebi, «Ana tili» debat klýbtary da qurylyp otyr.
Qyzylorda
