Prezıdent Qasym-Jomart Toqaevtyń Reseı Federasııasyna jumys sapary aıasynda «Orta Azııa – Ortalyq» magıstraldi gaz qubyrymen Reseıdiń tabıǵı gazyn Qazaqstan aýmaǵy arqyly О́zbekstanǵa tasymaldaý jobasyn iske qosý rásimi ótti.
Saltanatty is-sharaǵa Memleket basshysymen qatar Reseı Prezıdenti Vladımır Pýtın jáne О́zbekstan Prezıdenti Shavkat Mırzııoev qatysty.
Memleket basshysy óz sózinde bul tarıhı oqıǵa Qazaqstan, Reseı jáne О́zbekstannyń energetıka salasyndaǵy strategııalyq yntymaqtastyǵyn múlde jańa deńgeıge kóteretinin jáne elder arasyndaǵy tatý kórshilik qatynastar jylnamasynyń taǵy bir jarqyn betin ashatynyn atap ótti.
«Gaz salasy memleketterimizdiń turaqty áleýmettik-ekonomıkalyq damýynda zor ról atqarady deýge bolady. Sondyqtan bul joba barlyq qatysýshy taraptyń múddesine saı keledi. Qazaqstan óz aýmaǵynda magıstraldi gaz qubyryn daıyndaýdy ýaqtyly jáne tolyq aıaqtady. Joba Reseı gazynyń eksportqa shyǵý baǵyttaryn ártaraptandyryp, Qazaqstannyń gaz tasymaldaý ınfraqurylymyn keńeıtýge jáne jańǵyrtýǵa septigin tıgizedi. Sondaı-aq О́zbekstannyń jylyna 3 mıllıard tekshe metrge deıin jetetin jáne jyldan-jylǵa artyp kele jatqan tabıǵı gazǵa degen qajettiligin óteýge múmkindik beredi. Sonymen qatar ol elderimizdiń ónerkásibin damytýǵa, bıznes-ahýaldy jaqsartýǵa, azamattardyń turmys deńgeıin arttyrýǵa tyń serpin beredi», dedi Qazaqstan Prezıdenti.
Memleket basshysynyń pikirinshe, joba Ortalyq Azııa aımaǵyndaǵy turaqtylyq pen energetıkalyq qaýipsizdikti nyǵaıtý isinde eleýli ról atqarady.
«Jylyna 255 mıllıard tekshe metrge deıin gaz tasymaldaı alatyn magıstraldi gaz qubyrynyń 20 myń shaqyrymnan astam bóligi elimizdiń aýmaǵy arqyly ótedi. Qazaqstan óziniń tranzıttik áleýetin tolyq paıdalanýǵa múddeli jáne Reseı gazyn tasymaldaý kólemin odan ári ulǵaıtýǵa daıyn», dedi Prezıdent.
Qasym-Jomart Toqaev sóziniń sońynda mańyzdy transulttyq jobany ilgeriletýge qosqan jeke úlesi úshin Vladımır Pýtınge, sondaı-aq jan-jaqty qoldaý kórsetken Shavkat Mırzııoevke rızashylyǵyn bildirdi.
Memleket basshysy Qazaqstan, Reseı jáne О́zbekstannyń gaz salasyndaǵy mamandarynyń birlesken jumysty kásibı deńgeıde ári asa zor jaýapkershilikpen atqarǵanyn atap ótti. Sonymen qatar sharada Vladımır Pýtın men Shavkat Mırzııoev sóz sóıledi.
Telekópir barysynda Energetıka mınıstri Almasadam Sátqalıev Atyraý oblysyndaǵy «Maqat» kompressor stansııasynan baılanysqa shyǵyp, «Orta Azııa – Ortalyq» magıstraldi gaz qubyrynyń qazaqstandyq bóligi daıyn ekenin baıandady.
О́zbekstandaǵy «Qaraqalpaqııa» gaz ólsheý stansııasynan, Saratov oblysyndaǵy «Aleksandrov Gaı» kompressor stansııasy men Sankt-Peterbýrgtegi Lahta-Sentrden ózbekstandyq jáne reseılik gaz salasynyń mamandary bir mezgilde onlaın baılanysqa shyǵyp, daıyndyq jumystarynyń aıaqtalǵany jóninde habarlady.
Sodan keıin úsh eldiń basshylary Reseı gazyn Qazaqstan aýmaǵy arqyly О́zbekstanǵa tasymaldaý jobasyn iske qosýǵa ruqsat berdi.
