52 jastaǵy Belarýs mamany osymen «Barysqa» eki ret kelip, ekinshi márte jumysynan ketip otyr. Mundaı jaǵdaı shaıbaly hokkeı sport túrinde qalypty jaǵdaı sanalady. Andreı Skabelka eń alǵash «Barys» tizginin 2018-2020 jyldar aralyǵynda ustap, tabysty nátıjelerge qol jetkizgen bolatyn. Atap aıtqanda, elordalyq komanda Gagarın kýbogi jolynda jarystyń pleı-off kezeńine eki ret shyqqan edi. Biraq Skabelkanyń «Barysqa» ekinshi ret kelýi sátsiz boldy.
Turaqty birinshiliktiń bıylǵy maýsymynda «Barys» Andreı Skabelkanyń jetekshiligimen 15 oıyn ótkizip, sonyń tek úsheýinde ǵana jeńiske jetti. 12 márte jeńilistiń kermek dámin tatýǵa májbúr boldy. Qorjynynda nebári 11 upaı bar. Osy nátıjelerdi eskergen klýb basshylyǵy Belarýs mamanymen kelisimshartty úzýge májbúr boldy. Qazirgi tańda «Barys» QHL-diń Shyǵys konferensııasyndaǵy týrnır kestesinde 11-orynda tur. Endi bas bapker mindetin Ǵalym Mámbetalıev atqarady. «Barys» kelesi oıynyn búgin elordada Chelıabiniń «Traktor» komandasymen ótkizedi.
