Aǵaıyndylardyń anasy 5 qazan kúni keshkilik jumystan úıine oralǵanda balalardy tappaı qalǵan. Ana júregi bir sumdyqtyń bolǵanyn sezdi me eken, birden ýchaskelik ınspektorǵa habarlasyp, dabyl qaǵady. Galıskoe aýylynyń ýchaskelik ınspektory ózge aýyl turǵyndarymen birge balalardy izdeýge kirisken.
«Sol kúni saǵat 23:00-de eldi mekennen 500 metr jerdegi aýyl sharýashylyq alqaptaryn sýarýǵa arnalǵan jasandy sý qoımasynan balalardyń múrdeleri tabyldy. Denelerinde zorlyq-zombylyq belgileri joq. Atalǵan oqıǵa boıynsha sot-medısınalyq saraptama taǵaıyndaldy, onyń qorytyndysy boıynsha prosessýaldyq sheshim qabyldanady», dedi óńirlik polısııa departamentiniń baspasóz qyzmeti.
Polıseıler gıdrotehnıkalyq qurylystyń aınalasy qorshalmaǵanyn, al aýmaqtyń ózinde jaryq múlde tartylmaǵanyn anyqtady. Sýǵa jaqyndaýǵa nemese túsýge tyıym salatyn belgiler de tym az. «Munyń barlyǵy jaqyn aýylda turatyn azamattardyń ómirine zor qaýip tóndirip kelgen» degen baılam jasady tártip saqshylary. Qaıǵyly oqıǵaǵa baılanysty Qylmystyq kodekstiń 277-baby 3-bólimi jáne 254-baby boıynsha, ıaǵnı «abaısyzda eki nemese odan da kóp adamnyń ólimine ákep soqqan qurylys jumystaryn júrgizý kezinde qaýipsizdik erejelerin buzý jáne qyzmettik mindetterin adal atqarmaý boıynsha» tergeý amaldary júrgizilip jatyr.
Anyqtap bilgenimizdeı, aǵaly-inili balalar jergilikti orta mektepte 3 jáne 4-synyptarda oqyǵan. Al balalardyń ólimine sebep bolǵan jasandy sý qoımasy jergilikti «Galıskoe» JShS-na qaraıdy dedi basshysy Aleksandr Kasısyn. 170 myń sharshy metr sý syıatyn qurylys 2001 jyly qoldanysqa berilgen. Ol arqyly 347 gektar jerdiń egistigi sýarylyp kelipti. Tutas aýyldyń halqyn eńbekpen qamtyp otyrǵan seriktestik – elimizdegi iri sharýashylyqtardyń biri. Munda egin, mal jáne sút sharýashylyǵyna mán beriledi. Birneshe taýarly sút fermasy, mal bordaqylaýǵa arnalǵan zamanaýı úlgidegi keshenderi bar. Sharýa basshysy sý qoımasyndaǵy qaýipsizdik erejelerin qalaısha qaperden shyǵaryp alǵany tańǵaldyrady.
Pavlodar oblysy
