Jýyrda oblys ákimi Nurlybek Nálibaevtyń tóraǵalyǵymen kómir qoryn jasaqtaýǵa arnalǵan jıynda keıbir aýdandardyń jaýapty kezeńge daıyndyǵy kemshin ekeni aıtyldy. Aımaq basshysy jylý berý maýsymyna daıyndyq barysynda qajetti kómir qoryn jınaqtaýdyń oıdaǵydaı bolmaı turǵanyn atap ótti.
– Bul – Memleket basshysy men Úkimettiń tikeleı baqylaýyndaǵy másele. Kómir qoryn daıyndaýdy jaz aılarynan bastaý qajettigin eskertkenimizben keıbir ákimder jumysty áli de durys uıymdastyrmaǵan. Buǵan deıingi jınalystarda da tıisti aýdan ákimderine qatań eskertý jasalǵan bolatyn. Alaıda osy kúnge deıin Aral, Qazaly, Jalaǵash aýdandaryna qajetti kómir qorynyń 30 paıyzy ǵana jetkizilgen. Qarmaqshy, Jalaǵash, Syrdarııa aýdandarynyń kómir qoımalaryndaǵy kórsetkish te kóńilden shyqpaı tur. Jylý berý maýsymynda kómirge qatysty eshqandaı másele týyndamaýǵa tıis. Mundaı sylbyrlyqtyń zardabyn halyq tartpaýy kerek, – dedi oblys ákimi.
Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Bolatbek Ysmaǵulov jetkizilgen otyn qory, qala, aýdandardyń qamtylýy týraly baıandady.
Jıynda barlyq jaýapty basshyǵa jylý berý maýsymyna daıyndyq barysyn qatań baqylaý tapsyryldy. Oblystyq energetıka jáne turǵyn úı-kommýnaldyq sharýashylyǵy basqarmasy jetkizilgen otyn qoryna kúndelikti monıtorıng júrgizip otyrýy kerek. Al Qyzylorda qalasy jáne aýdan ákimdikteri jylý berý maýsymy josparyna sáıkes qajetti kómirdi jetkizý, qoımalarda qor jınaýdy uıymdastyrýǵa tıis. Sondaı-aq kómirdiń turǵyndarǵa deldalsyz tikeleı satylýy, onyń baǵasy da baqylaýǵa alynýy qajet.
