FOTO: dknews.kz
Is-sharaǵa tóraǵalyq etken senator Lázzat Rysbekova óz sózinde Memleket basshysy otandyq bıznes ókilderimen kezdesýde kásipkerlikti odan ári damytý jóninde naqty mindetter qoıǵanyn atap ótti.
«Shaǵyn jáne orta kásipkerlikti damytýdyń búgingi kezeńinde naqty sharalardy, onyń ishinde zańnamalyq sharalardy ázirleý mańyzdy ekeni daýsyz. Biz múddeli memlekettik organdarmen jáne bıznes ókilderimen birneshe ret kezdesý ótkizdik. Osy máseleniń erekshe mańyzyn eskere otyryp, Parlament Senaty osy jyldyń 3 qarashasynda Qazaqstan Respýblıkasyndaǵy shaǵyn jáne orta kásipkerlikti damytý taqyryby boıynsha Úkimet saǵatyn ótkizýdi josparlap otyr», dedi senator.
Kezdesý barysynda «Qazaqstan mashına jasaýshylar odaǵy» ZTB Basqarma tóraǵasynyń orynbasary Erqanat Maqanov baıandama jasady. Ol jańa Salyq kodeksi aıasynda metall ónimderin ımporttaıtyn óndirýshilerdi QQS tóleýden bosatý tetigin engizýdi usyndy. Al «Qazaqstan Respýblıkasynyń hımıkter odaǵy» ZTB vıse-prezıdenti Tahmına Naǵymanova óńdeý ónerkásibinde orta bıznesti damytý máselesin kóterdi. Ol salyq zańnamasyna óńdeýshi ónerkásip sýbektilerine bólshek saýda salyǵyna uqsas arnaıy salyq tártibin qarastyrýdy usyndy.
Jıynda elimizdegi shaǵyn jáne orta bıznestiń tıimdi damýyn tejeıtin júıeli máseleler men kedergiler týraly, sondaı-aq olardy sheshý jónindegi naqty sharalar jóninde aıtyldy. Olardyń ishinde salyq salý, shaǵyn jáne orta bıznes sýbektilerine qarjynyń qoljetimdiligin ulǵaıtý, onyń ishinde ekinshi deńgeıdegi bankter arqyly nesıe berý, memlekettik qoldaýdyń tıimdiligin qamtamasyz etý jáne basqa da múmkindikter týraly sóz boldy.
Depýtattar kezdesýde aıtylǵan usynystar Úkimetke jáne múddeli memlekettik organdarǵa jiberiletin usynymdarda kórinis tabatynyn atap ótti.
