Jol salýdy qarjyǵa qol salý dep túsinetin qaısybir merdigerler men pysyqaı sheneýnikterdiń jymysqy áreketi Memleket basshysynyń da nazarynan tys qalǵan joq. «Ádiletti Qazaqstannyń ekonomıkalyq baǵdary» atty Qazaqstan halqyna arnaǵan Joldaýynda Qasym-Jomart Toqaev jol salý jumysyna qadaǵalaýdy kúsheıtýdi shegelep tapsyrdy. Tipti, Prezıdent eldegi joldardyń jaıy jurttyń júıkesin shymyrlatatynyn da qadap aıtty.
«Avtokólik joldarynyń qurylysy máselesi sheshimin tabýy tıis. Qazir onyń sapasy syn kótermeıdi. Tıisti jumystar ýaqtyly jáne sapaly jasalmaıdy. Jemqorlyq beleń alyp tur, báseke de joqtyń qasy. Munyń bári - osy salada tamyr jaıǵan kemshilikter. Sondyqtan jyl sońyna deıin naqty sharalar qabyldaý qajet. Mindetin adal atqarmaǵan kompanııalar zań boıynsha jaýapqa tartylady. Bul máselege basa nazar aýdaramyn. Baqylaýdy kúsheıtip, jańa normatıvtik qujattar qabyldaý kerek», degen Prezıdent sóziniń jany bar.
Memleketimizde jol salý, qaıta qurý, jóndeý jáne kútip ustaý, sondaı-aq jol aktıvterin basqarý salasyndaǵy jumystar men materıaldardyń sapasyn saralaý jumystary «Jol aktıvteri ulttyq sapa ortalyǵynyń» negizgi mindeti retinde belgilengen.
Kásiporynnyń óńirlik fılıaly jyl ishinde az jumys atqarmaǵan. Sapa jáne esep bóliminiń ınjeneri Toıshybaı Álıahmetov keltirgen derekke júginsek, «Jol aktıvteri ulttyq sapa ortalyǵynyń» Jambyl oblystyq fılıaly az ýaqyt ishinde 211 nysanǵa arnaıy at basyn buryp, 431 ret issaparmen barǵan. Nátıjesinde jol-qurylysyna qajetti materıaldardan 1253 dana úlgi alynǵan. Álbette, az emes, biraq sapa jaǵy máz emes. Nege deısiz ǵoı? Synaqtan ótkizilgen 123 dana materıaldyń talapqa saı kelmeıtini naqtylanypty.
«Mamandar anyqtaǵan kemshilikter boıynsha tapsyrys berýshi tarap pen merdiger uıymdarǵa tıisti hat joldandy. Merdiger kompanııalar jaýapkershilik júgin sezinip, jumystyń sapaly atqarylýyna den qoısa deımiz. Ásirese, asfalt beton jabyndysyn ornatý tehnologııasyna aıryqsha nazar aýdarsa degen tilek bar. Sapasyz salynǵan jol talaı oqıǵanyń sebebine aınalýy yqtımal. О́kinishke qaraı, búginde el ishindegi tas joldardyń sapasy syn kótermeı tur. Bul máselege Memleket basshysy da aıryqsha den qoıdy. Aldaǵy ýaqytta merdigerlerdiń jumysyna baqylaýdy kúsheıtý kerek», deıdi T. Álıahmetov máseleniń mánisine úńilip.
Basqany bylaı qoıǵanda jol salý jumystaryna mıllıardtaǵan qarajat qarastyrylatyny anyq. Qyrýar qarjy jumsalsa da jol máselesi áli kúnge deıin sheshimin tappaı tur. Aqyly jolǵa aqsha tólep júrgen aqyldy kólik júrgizýshileriniń de aıtary az emes. Halyqtan túsken salyq esebinen salynǵan joldyń sapaly bolǵanyn qalaıdy olar. Alaıda salada qalyptasqan olqylyq tyıylar emes.
«Jol aktıvteri ulttyq sapa ortalyǵy» óńirlik fılıalynyń qyzmetkerleri bıylǵy jyldyń 9 aıynda 309 nysanǵa 559 ret issaparlatyp arnaıy barǵan. Jumys prosesinde jol-qurylys materıaldarynyń 1736 danasynan úlgi alynyp, onyń 266-sy normatıvtik talaptarǵa saı kelmeıtinin anyqtaǵan. Júrgizilgen jumystardyń nátıjesinde tıisti taraptarǵa 121 hat joldapty. Mamandardyń aıtýynsha, jumys prosesi barysynda asfalt-beton jamylǵysyn tıisti deńgeıde tyǵyzdamaý máselesi kózge uryp tur eken.
О́ńirlik fılıaldaǵy mamandar ómirlik máseleni alǵa tartyp otyr. Qysqasy jol qurylysyna jaýapty barlyq tarap jol salýdy qarjyǵa qol salýmen shatastyrmaýy kerek. Sonda ǵana Prezıdent tapsyrmasy tolyqtaı oryndalmaq.
