senate.parlam.kz
Palata Spıkeri sońǵy jyldary Digital Bridge forýmy aıtarlyqtaı keńeıip, IT-ındýstrııany damytý salasynda tanymal jáne bedeldi alańǵa aınalǵanyn atap ótti. Bıyl atalǵan forýmǵa 20 myńnan astam adam qatysyp jatyr. Olardyń qatarynda 300-den astam IT-kompanııanyń ókilderi men 30 elden kelgen delegasııa músheleri bar. M.Áshimbaev elimizde IT salasyna joǵary deńgeıde basa mán berilip kele jatqanyn tilge tıek etti. Qazaqstan elektrondy Úkimet pen fıntehti damytý ındeksi boıynsha álemdik kóshbasshylar qatarynda ekendigi de aıtyldy.
«Memleket basshysy taıaýda jarııalaǵan Joldaýynda IT salasyna erekshe kóńil bóldi. Prezıdentimiz 2026 jylǵa qaraı IT qyzmetteriniń eksportyn bir mıllıard dollarǵa jetkizý jóninde strategııalyq mindet júktedi. Osyǵan baılanysty Parlamenttiń aldynda atalǵan tapsyrmanyń oryndalýyn qajetti quqyqtyq bazamen qamtamasyz etý mindeti tur. Elimizdegi qazir qoldanystaǵy jáne qalyptasyp jatqan quqyqtyq jaǵdaı halyqaralyq kompanııalardyń bizdiń naryqqa kelýin yntalandyrýy kerek. Sondaı-aq qazaqstandyq IT-kompanııalardyń damýyna yqpal etýge tıis», dedi M.Áshimbaev.
Kezdesýde elimizde IT-salany qoǵamnyń suranystary men jahandyq trendterdi eskere otyryp damytýdyń keleshegi talqylandy. Jasandy ıntellekttiń damýyna qatysty syn-qaterler de aıtyldy. Sonymen qatar is-sharada jastar óz tájirıbelerimen bólisip, salanyń sapasyn arttyrýǵa arnalǵan jobalardy iske asyrý jónindegi usynystaryn talqyǵa usyndy.
