Foto: aqorda_resmi
Keńes otyrysynda Qasym-Jomart Toqaev týyndaıtyn syn-qaterlerdi eńserýge, tabysty yntymaqtastyqty nyǵaıtý úshin jańa salalardy izdeýge baǵyttalǵan TMD formatyndaǵy belsendi yqpaldastyqty jalǵastyrýǵa úndedi.
«Tyǵyz saýda-ekonomıkalyq baılanystardy damytý negizgi mindet bolyp qala beredi. Dostastyqqa múshe elderdiń naryqtary biz úshin qashanda basymdyqqa ıe. О́tken jyldyń qorytyndysy boıynsha Qazaqstannyń syrtqy saýda aınalymynyń tórtten birinen astamy TMD memleketterimen jasaldy. Bul oń dınamıka bıyl da saqtalyp otyr. Qazaqstannyń saýda aınalymy 7 aıda 4,4 paıyzǵa ósip, 20,6 mıllıard dollardy qurady. Biz saýda baılanystaryn odan ári nyǵaıtý úshin qolda bar múmkindikterdi tolyq paıdalanýymyz qajet», dedi Q.Toqaev.
Memleket basshysy saýda kedergilerin joıýǵa, qolaıly tarıftik jaǵdaı jasaýǵa, ákimshilik rásimderdi jeńildetýge basa mán berý qajettigin de eskertti. Dostastyq keńistigindegi kólik dálizderin damytý mańyzdy ekenin de atap ótti.
«Biz ózimizdiń biregeı geografııalyq artyqshylyǵymyzdy paıdalanyp, jahandyq naryqtardy ushtastyrýymyz kerek. Osylaısha, aımaǵymyzdy iri kólik-logıstıkalyq habqa aınaldyramyz. Álemde jańa ekonomıkalyq geografııa qalyptasyp, saýda aǵyndary ulǵaıa túsken qazirgi jaǵdaıda bul baǵyt strategııalyq mańyzǵa ıe bolady. Búginde Eýropa men Azııa arasyndaǵy qurlyqtyq-tranzıttik tasymaldyń 80 paıyzy Qazaqstan arqyly ótedi. Biz Transkaspıı kólik baǵytyn, «Soltústik – Ońtústik» dálizin odan ári damytýǵa, sondaı-aq «Qazaqstan – Túrikmenstan – Iran» temirjolynyń múmkindikterin tolyqqandy paıdalanýǵa aıryqsha mán beremiz. Qazaqstan «Dostyq – Moıynty», «Baqty – Aıagóz», «Darbaza – Maqtaaral» temirjol jobalaryn tezirek iske asyrýdy kózdeıdi», dedi Prezıdent.
