Agroqogam.kz saıtynyń aıtýyna qaraǵanda kásiporyn tirkeme tehnıkalardy jınaýdy qolǵa alatyn bolǵan. Osy baspanyń jazýyna qaraǵanda Soltústik Qazaqstan oblystyq kásipkerlik jáne ındýstrıaldy-ınnovasııalyq damý basqarmasynyń bastyǵy Nurjan Sadyqov bul kásiporynnyń jumysynan úlken úmit etetindikterin aıtqan. «Claas» tehnıkalaryna sáıkes ónimder shyǵaratyn bul kásiporynnyń bolashaǵynan biz úlken úmit kútemiz», degen edi ol kóktemde bergen suhbatynda.
Búgingi tańda «Reimann» JShS ónim shyǵarýǵa qajetti qurylys ornynyń negizgi qurylystyq-montajdyq jumystaryn aıaqtady. Osynaý jumystarǵa quıylǵan ınvestısııa kólemi 1,5 mlrd teńgege jetip otyr. Jýyrda osy kásiporynnyń jumys barysymen oblys ákimi Ǵaýez Nurmuhambetov tanysty. Kásiporyn basshylyǵy jyldyń aıaǵyna qaraı ózderiniń ónimderin shyǵaratynyn jetkizdi. «Biz jylyna 150 dana tirkeme tehnıkalaryn shyǵaratyn bolamyz. Kásiporyn tolyq qýatyna engende 150 adamǵa jumys oryndary ashylatyn bolady. Búgingi tańǵa deıin Germanııalyq áriptesterimizben yntymaqtastyq kelisimderi jasalǵan», dedi kásiporyn basshysy Vladımır Kovshov.
Bul kásiporyn Germanııanyń «Claas» jáne «Horsch» kompanııalarymen yntymaqtastyq ornatqan. Germanııa agrosharýashylyq salasy bıznesiniń jaryq juldyzy – «Claas» kompanııasynyń «Qyzyljar» AEA kelýimen osyndaı qosalqy kásiporyndar da kelip jatyr. Oblys ákimi olardyń jumysyna qanaǵattanǵandyq bildirip, elimizdi aýyl sharýashylyǵy ónimderimen tolyq qamtamasyz etýge olardyń isi qýatty kómek bolatynyna rızashylyǵyn aıtty.
Buǵan deıin Ǵ.Nurmuhambetov «Qaztehmash» mashına jasaý zaýytynda da bolǵan edi. Búgingi tańda onda 85 adam jumys isteıdi, ortasha eńbekaqy 300 myń teńgeniń kóleminde. Shyǵaratyn ónimderi elimizdiń barlyq aýmaǵyna taraıdy. Kásiporyn fınlıandııalyq brend sanalatyn «Sampo» kombaındaryn jınaıdy. JShS-nyń bas dırektory ákimge: «Biz orta jáne iri torapty qurastyrýlarmen aınalysamyz. Kombaınnyń 670 túrli bólshekterin qabyldap, olardy daıyn ónim etip jınaımyz. Sonymen birge daıyn kombaındardyń belgili ýaqytqa deıin toqtaýsyz júrýine kepildik beretin qyzmet te uıymdastyrdyq», dedi. Kásiporyn jyl saıyn 300 kombaınǵa deıin qurastyrýdy mejelep otyr. Búgingi tańda 300 mln teńgeniń bólshekterin alýǵa tapsyrys berip qoıypty.
Qazir Petropavldaǵy daıyn ónim shyǵaratyn kásiporyndardyń arasynda «Alageum Electric» kompanııasy úzdikterdiń qataryna engen. Elimizdiń birneshe qalasynda fılıaldaryn ashyp, transformator shyǵaratyn bul kásiporyn týraly «Egemenge» buryn da jazǵan bolatynbyz. Ol da «Qyzyljar» AEA-da shańyraq kótergen kásiporyndardyń biri. Qazir kásiporynda 200-ge jýyq adam nápaqasyn aıyrýda. Ortasha eńbekaqy 330 myń teńgeden keledi eken. Bular týraly oblys ákimine kásiporynnyń dırektory Ersultan Shámshıev aıtyp berdi. Kásiporynnyń taǵy bir ereksheligi – ol óz jumysshylaryna arnap salyp jatqan 100 páterlik úıdiń qurylysyn da aıaqtap qaldy. Qazannyń sońǵy kúnderiniń birinde júz shaqty shańyraq jańa páterlerdiń kiltin alatyn bolady. «Árıne, úıler tegin berilmeıdi. Biz páter berýshi, «Otbasy bank» jáne páter satyp alýshy úsh jaqty kelisimshart jasaımyz. Bizde bes jyl jumys istegen jumysshy páterdiń jarty aqshasyn óziniń depozıtinde jınaǵan bolsa qalǵanyn «Otbasy bank» ony ıpoteka arqyly nesıelendirip, páterdi óziniń menshigine alatyn bolady», dedi Ersultan Shámshıev.
Sonymen birge oblys ákimi turmystyq hımııa ónimderin shyǵaratyn «Radýga» JShS men AEA taǵy bir qatysýshysy «KazKran» JShS jumysymen tanysty. «Radýganyń» óndiris rynogynda júrgenine birneshe jyldyń júzi boldy. Qazir onda aı saıyn 100 tonnaǵa jýyq suıyq jáne qatty sabyn shyǵarylady. Kúnine 20 tonnadaı makýlatýrany óńdep, 20 túrli taza qaǵaz ónimderin jasaıdy. Munda qazir 80-deı adam jumys istep, aıyna 250 tonnadaı daıyn ónimder shyǵarady. Fabrıka ónimderiniń qatarynda mehanıkalyq jáshikter, shkaftar, metaldyq jıhazdar jáne t.b. bar.
Oblys ákimi kótergish jaraqtar men kópirlik krandar shyǵaratyn zaýyttyń da jumysymen tanysty. Bul kásiporyn da «Qyzyljar» AEA qatysýshysy. 2 mlrd teńge ınvestısııa quıylǵan kásiporynnyń ónimderi 2025 jyldan bastap shyǵady, qazir onda jumys oryndary daıyndalý ústinde. Qyzyljardyń óndiristiń qýaty osyndaı qarqynmen damyp keledi.
PETROPAVL
