Bul operasııany Ulttyq neırohırýrgııa ortalyǵynyń dárigerleri Ana men bala ulttyq ǵylymı ortalyǵynyń akýsher-gınekologterimen birlesip jasaǵan. Áýeli mıdyń sol jaq samaı bóligindegi isikti mıkrohırýrgııalyq ádispen alyp tastaǵan. Kóp kidirmeı júktiliktiń 34 aptasyndaǵy áıeldi kesar tiligi arqyly bosandyrǵan.
Negizi dárigerler jas áıeldiń mańdaı bóligindegi kólemdi isikti shildede anyqtaǵan. Sodan júktiliktiń 29-aptasynda naýqas Ulttyq neırohırýrgııa ortalyǵyna jatqan. Dárigerler sharanany saqtaı otyryp, naýqastyń sol jaq mańdaı bóliginiń isigin alyp tastaý úshin operasııa jasaǵan. Keıin áıeldiń densaýlyǵy jaqsaryp, úıge shyǵarylypty. Alaıda kóp uzamaı pasıent densaýlyǵynyń qaıta nasharlaı bastaǵanyn sezedi. Dárigerler taǵy teksere kele, isiktiń ulǵaıǵanyn baıqaǵan. Operasııadan keıin naýqastyń samaıyndaǵy isik mólsheri ulǵaıýymen qoımaı, fýnksıonaldy mańyzdy aımaqtarǵa tez óse bastapty. Bul – pasıenttiń qozǵalys jáne sóıleý ortalyqtarynyń buzylýyna áser etken.
Mıdyń sol jaq samaı bóligindegi isikti mıkrohırýrgııalyq ádispen alyp tastaý operasııasyna neırohırýrgter aralasqan. Kólemdi isik tolyǵymen joıylǵan. Munda dárigerler ana men balaǵa zııan keltirmeýdi oılap, hırýrgııalyq tásildi durys tańdaı bilgenin aıta ketkenimiz jón. Onyń ústine neırohırýrgter men akýsher-gınekologter operasııada jıi tize qosa bermeıdi. Sonymen operasııadan keıin salmaǵy – 1 350 gramm, boıy 48 sm náreste dúnıege kelgen. Jańa týǵan sábıge odan ári medısınalyq kútim jasaý úshin Ana men bala ulttyq ǵylymı ortalyǵynyń Neonatologııa bólimshesine aýystyrǵan.
Qýanyshqa oraı, eki operasııa da sátti ótken. Qazir balanyń jaǵdaıy jaqsy, salmaq jınap, óse bastaǵan. Ana da ózin jaqsy sezinedi. Operasııany Neırohırýrgııa ortalyǵynyń úzdik dárigerleri jáne Ana men bala ortalyǵynyń tájirıbeli akýsher-gınekologteri júrgizgenin aıttyq. Ulttyq neırohırýrgııa ortalyǵynyń dárigerleri mundaı operasııany úshinshi márte jasap otyr eken.
