Astanada ótken kezdesýde taraptar saýda-ekonomıkalyq ózara is-qımyldy arttyrý perspektıvalaryn, ınvestısııalyq yntymaqtastyq, memlekettik basqarý salasyndaǵy tájirıbe almasý qadamdaryn jáne basqa da máselelerdi qarastyrdy.
Premer-mınıstr Birikken Arab Ámirlikteri elimizdiń Parsy shyǵanaǵy aımaǵyndaǵy negizgi saýda-ekonomıkalyq seriktesteriniń biri ekenin erekshe atap ótti. Máselen, ótken jyldyń qorytyndysyna sáıkes eki el arasyndaǵy taýar aınalymy 633 mln dollardy qurady. Sonymen qatar jaqyn arada ózara saýda aýqymyn keńeıtý arqyly bul kórsetkishti 1 mlrd dollarǵa deıin arttyrýǵa múmkindik bar.
Álıhan Smaıylov atap ótkendeı, ınvestısııalyq ózara is-qımyl jańa jobalarmen de qoldaý taýyp otyr. Máselen, elimizge tartylǵan Ámirlikter ınvestısııasy ótken jyly – 27%-ǵa ósip, shamamen 420 mln dollarǵa deıin jetken.
«Birinshi jartyjyldyqta bul kórsetkish 3 eseden astam ósti jáne qazirdiń ózinde 400 mln dollardan asty. Biz barlyq basym baǵyt boıynsha odan ári yntymaqtastyqqa ashyqpyz jáne Ámirlikter ınvestorlaryna olardyń bastamalaryn iske asyrýda jan-jaqty qoldaý kórsetýge daıynbyz», dedi Premer-mınıstr.
Sondaı-aq ol búginde Qazaqstan men BAÁ arasynda memlekettik basqarý salasyndaǵy ózara is-qımyl belsendi damyp kele jatqanyn aıtty. Aqpan aıynda Dýbaıda ótken Dúnıejúzilik úkimet sammıti aıasynda tıisti memorandýmǵa qol qoıyldy.
«Biz tájirıbe almasýdyń bul múmkindigin joǵary baǵalaımyz jáne memlekettik júıeniń tıimdiligin arttyrý úshin Ámirlikterdiń ozyq tájirıbesin zerdeleýge múddelimiz», dedi Álıhan Smaıylov.
О́z kezeginde Muhammed Ál-Gargaýı Birikken Arab Ámirlikteri elimizben qarym-qatynasty damytýǵa úlken mán beretinin basa aıtty.
«Biz ekonomıkalyq salada oń nátıjelerdi kórip otyrmyz. Árıne, bizde ortaq úlken áleýet bar. Ekonomıkalyq damýmen qatar, bizdiń halqymyzdyń arasyndaǵy dostyqtyń, týrıster sanynyń arta túskenin de kórip otyrmyz. Biz bul kórsetkishterdiń barlyǵy odan ári ósedi dep úmittenemiz», dedi ol.
