Polısııa organdary servıstik modelge kóshkeli tártip saqshylarynyń jumysy da jaqsara túsken. Jyl basynan óńirdegi quqyq buzýshylyqtardyń sany shamamen 13 paıyzǵa tómendegeni baıqalady. Pavlodar oblysy polısııa departamenti basshysynyń birinshi orynbasary Jasqaırat Qaıyrovtyń málimetinshe, tirkelgen qylmystardyń úlesi 10 myń adamǵa shaqqanda 67 jaǵdaıdy kórsetip otyr.
«Bul – respýblıkadaǵy eń tómengi kórsetkishterdiń biri, – deıdi ol. – Qylmysty izin sýytpaı ashýdaǵy polıseılerdiń belsendiligi ósken. Jalpy, jasalǵan qylmystardyń 59,2 paıyzy jedel is-qımyldyń arqasynda az ýaqyt ishinde ashylǵan. Olar boıynsha 121 qylmystyq is ashylyp, 51 qylmystyq top qolǵa tústi. Zańsyz qarý-jaraq aınalymynan eshbir jerde tirkelmegen 40 qarý tárkilendi. Tergeý-tekserý organdarynyń óndirisinde 8,6 myń qylmystyq is tirkelse, onyń jartysynan astamy sotqa baǵyttaldy. Bıyl alǵashqy 9 aıda óńir azamattary 120 myń ret zań buzǵan. Olardyń eki myńnan astamy otbasy-turmystyq qatynastar salasyna tıesili.
Jol-kólik oqıǵalarynyń sany da edáýir tómendegeni baıqalyp otyr. Byltyrmen salystyrǵanda, joldaǵy apat 9,1 paıyzǵa kemimgen. Alaıda kólik apatynan qaıtys bolǵandar sany kerisinshe 10 paıyzǵa kóbeıgen. Jol patrýlderi ózge salanyń mamandarymen birge avtojoldardy zerdelep shyǵyp, eki myńnan astam kemshilikti anyqtapty. Júrgizilgen zertteýler nátıjesinde olqylyqtardy ornyna keltirý týraly jaýapty mekemelerge uıǵarymdar jóneltilgen. Joldardyń kútimine salǵyrt qaraǵan jáne ondaǵy óndiris qaǵıdalaryn buzǵany úshin 171 laýazymdy jáne zańdy tulǵa jaýapkershilikke tartylǵan.
Joǵaryda atap ótkendeı, qazirgi tańda óńirde «Polısııanyń servıstik modeli» jobasy aıasyndaǵy júıeni damytý jalǵasyn taýyp jatyr. Polısııa jumysyn turǵyndar úshin tıimdi ete túsýdi kózdeıtin jobaǵa polısııanyń sapaly qyzmeti, klıentke baǵdarlaný, úkimettik emes uıymdarmen, memlekettik mekemelermen turaqty seriktestik jasaý baǵyttary engen.
«Polısııanyń servıstik modeli – bılik organdaryna degen senimdi arttyrý, qaýipsizdikti qamtamasyz etý maqsatynda polısııanyń qoǵammen birlesken qyzmeti. Iаǵnı qoǵam músheleriniń qaýipsizdik máselelerin anyqtaý úderisine belsendi qatysýy degendi bildiredi. «Azamattardy qatystyrý sheńberinde quqyq buzýshylyqtardyń aldyn alý jáne qylmysqa qarsy kúres keńinen, jan-jaqty qarastyrylady. Bul polısııa qyzmetine tereń ózgerister engizip keledi. Máselen, buǵan deıin «Jurtqa jaqyn polısııa» qaǵıdaty jergilikti polısııa qyzmetiniń jumysyna jańa serpin berdi. Qoǵammen ashyq til tabysý, azamattardyń senimine ıe bolý, atqarylǵan jumystardy ashyq kórsetý jáne kópshilikpen birlese qylmystyń aldyn alý jumystary árbir ýchaskelik polısııa ınspektorynyń basty maqsatyna aınaldy», dep atap ótti J.Qaıyrov.
Buǵan deıin oblys ortalyǵynda elimiz boıynsha alǵash ret servıstik qyzmet kórsetetin ýchaskelik polısııa pýnkti ashyldy. Munda azamattar polısııanyń quzyryndaǵy kez kelgen qyzmetti ala alady. Qoǵamdyq oryndarda polısııanyń turaqty bolýyna jáne halyqtyń qaýipsizdigin qamtamasyz etýge baǵyttalǵan servıstik ortalyq 57 myńnan astam adam turatyn «Ýsolka» shaǵyn aýdanynda ornalasqan. Nysanda azamattardy qabyldaýǵa jáne jurtshylyqpen jumys isteýge arnalǵan bólmeler, ana men bala bólmesi, májilis zaly, qyzmettik, demalys jáne tamaqtanýǵa arnalǵan bólmeler bar. Ortalyqta jalpy sany 16 tártip saqshysy qyzmet kórsetedi.
Pavlodar oblysy
