Oqıǵa 7 qazan kúni bolǵan. Keıýanaǵa belgisiz bireý telefon shalyp, nemeresiniń jol apatyna túskenin, oǵan nemeresi kináli ekenin aıtyp, shyǵyndy óteý úshin jábirlenýshige jedel túrde aqsha berý qajettigin jetkizedi. О́zin «polısııa qyzmetkerimin» dep tanystyrǵan alaıaq nemeresi aýrýhanada jatqanyn aıtyp, qara bultty tipti qoıýlatqan. Úreıi ushqan ájeı sol jerde bar jıǵan-tergen 1,5 mıllıon teńge qarajatty sómkege salyp, úıdiń aldyna kelgen taksı júrgizýshisiniń qolyna ustatady. Biraz ýaqyttan keıin nemeresimen habarlasyp, óziniń alaıaqqa aldanǵanyn bir-aq biledi.
Oral qalalyq polısııa bólimine habarlasqan keıýananyń shaǵymynan keıin polısııa qyzmetkerleri dereý iske kirisken. Áýeli ájeniń úıinen aqshany alyp ketken taksıdi tabady. Ol álgi qarajatty alyp, alaıaqtarǵa jetkizý úshin Atyraýǵa ketip bara jatyr eken.
«Qoldanylǵan jedel izdestirý is-sharasy barysynda Oral qalalyq Polısııa basqarmasynyń Abaı bólimine qarasty krımınaldyq polısııa qyzmetkerleri Atyraý oblysyndaǵy áriptesterimen birlesip, taksı júrgizýshisi týraly aqparatty anyqtady. Bizdiń qyzmetker taksı júrgizýshisine habarlasyp, sálemdemeni aldyryp jatqan alaıaqtar ekenin eskertti. Sóıtip, taksı orta joldan keıin qaıtaryldy. Polısııa qyzmetkerleri aqsha salynǵan sómkeni jábirlenýshige qaıtardy», deıdi polısııa departamenti baspasóz qyzmetiniń ókili Asylaı Ǵubasheva.
Osy oqıǵaǵa oraı Qylmystyq kodekstiń 190-babynyń 1-bóligine (alaıaqtyq) sáıkes tergeý bastalǵan. Polısııa alaıaqtyq jasamaq bolǵan adamdardy anyqtaý maqsatynda jedel izdestirý sharalaryn júrgizip jatyr.
Batys Qazaqstan oblysy
