Foto: vıdeo skrın
Májilis depýtatynyń aıtýynsha, Azıada-2023 oıyndarynda elimizdiń kórsetkishi kóńilimizge qaıaý túsirdi. Bul tusta depýtat sportshylardy dattaýdyń qajeti joq ekenin aıtyp, baryn salǵan sportshy ul-qyzdarǵa alǵys bildirdi.
«10 ǵana altyn medal alǵan el quramasynyń kórsetkishi sport jankúıerleriniń kóńilinen shyqpady. Tórt jylda bir ret keletin Azııa dodasy biz úshin sátsiz aıaqtaldy», dep qynjyldy depýtat.
Onyń aıtýynsha, burnaǵy jyldary bolǵan Azıadalardyń nátıjelerinde ulttyq qurama qorjynyna keminde 15 altyn medal túsip otyrdy, qazaq sportshylary úzdik ondyqtan túspeı, árdaıym tórtinshi, besinshi oryndardy ıemdenip kelgen. Al bıyl kórsetkish áldeqaıda tómen.
«Biz tipti, Soltústik Koreıa, Taıland, Bahreın sekildi shaǵyn elderden de artta qalyp qoıdyq. Árıne, máseleniń túpki sebebi osy saladaǵy júıeli problemalarda ekeni anyq. Osy Azııa oıyndaryna 530-dan astam sportshy qatysty, oǵan uıymdastyrýshylar, bapkerler, federasııa múshelerin qosqanda myńdaǵan azamat bardy. San bar, sapa qaıda? Bizdi kúıretip jatqan ne másele?», dedi Májilis depýtaty.
Keshe ǵana Memleket basshysy Azıada qorytytyndysy boıynsha sport salasyn ashy synǵa alyp: «Ashyǵyn aıtýymyz kerek, nátıjemiz memleketten bólinip jatqan qarajattyń barynsha tıimdi jumsalmaıtynyn kórsetedi. Bundaı jaǵdaıǵa jol berýge bolmaıdy. Sport salasyna túbegeıli ózgerister, ıaǵnı reforma qajet. Tıisti mınıstrlik osy máseleni jan-jaqty qaraý kerek, sportty damytýdyń múlde jańa joldary qajet», degen Prezıdent sózin tilge tıek etken D.Qasqaraýov birneshe máseleni aıta ketti. Olar:
1) Sońǵy jyldary Sport mınıstrligin múldem sportqa qatysy joq kásibı sportty tek teledıdardan kóretin laýazymdy shendiler basqaryp keldi.
2) Sport uıymdary, mınıstrlik, ulttyq olımpıada, federasııa aralarynda ózara baılanys joq.
3) Bizde bitpeıtin legıonerlerdiń jyry. Elimizde úzdik nátıjege qol jetkizý úshin barynsha eńbek etýge daıyn óz sportshylarymyz jeterlik. Legıonerlerge ıek arta bermeı, ózimizdiń sportshylarymyzǵa jol ashý kerek.
4) Aýyldarda kásibı sport joq deýge bolady, daryndylar jetedi, biraq ınfraqurylym joq, sebebi jaǵdaı jasalmaǵan.
«Ashyǵyn aıtqanda memleketten bólinip jatqan qarajat orynsyz jumsalyp jatyr. Aılyǵy shaılyǵynan artylmaıtyn bapkerler, sport mamandary, sportshylardan úzdik nátıje kútý úshin qajetti jaǵdaı qashan jasalady?», dep sózin aıaqtady Danııar Qasqaraýov.
