Sýretti túsirgen – Igor BÝRGANDINOV
L.N.Gýmılev atyndaǵy Eýrazııa ulttyq ýnıversıtetinde ádebıettanýshy-professor Serik Negımovtiń «Abaı ǵıbratnamasy» kitabynyń tanystyrylymy ótti. Is-sharaǵa memleket jáne qoǵam qaıratkerleri, QR Parlamenti Senatynyń depýtattary, ǵylymı qaýym ókilderi, qalamgerler men jastar qatysty.
Professor Serik Negımov «Abaı ǵıbratnamasy» eńbeginde hakimniń jan-jaqty danalyq bolmysyn, dara tujyrymdaryn ashýǵa tyrysqan. Kitap «Minez – saýyt», «Sóz kelisi», «Ar oıla», «Shyn aqyl» syndy tórt taraýdan turady. Jınaqta Abaı eńbekterindegi mańyzdy túıinder ǵylymı, tanymdyq turǵyda jan-jaqty saralanyp, oqyrmanǵa túsinikti, jatyq tilde jetkizilgen.
«Abaı ǵıbratnamasy» kitaby «Senimen bolashaq» qoǵamdyq birlestiginiń qoldaýymen jaryq kórgen. Birlestik quryltaıshysy Nurken Asanov óz sózinde kitapty ár óńir oqyrmandaryna jetkizý isin qolǵa alatynyn aıtty. Avtor hakimniń ulttyq jáne jalpyadamzattyq ıdeıalarǵa baı qordaly oılary ǵıbrat ári kemeńgerlik keńes retinde qabyldanatynyn jetkizdi.
«Abaıdyń bir sózi sypaılyqqa, bir sózi eńbektenýge, bir sózi óner, bilim, ǵylymǵa, bir sózi ádilet, arlylyq, mahabbatqa úndeıdi. Abaı – kóregen kóshbasshy. Abaı qudireti degenimiz – ult bolmysynyń qudireti. Sol sebepti Abaı poezııasynyń tańǵajaıyp kórkemdik naqyshtary, sulýlyq syrlary, ádebı-estetıkalyq dúnıetaný daralyǵy, obrazdyq-sımvoldyq astar-qabattary telegeı. Abaı shyǵarmashylyǵy – zamandar men dáýirler boıy jasaǵan halyq tiliniń aınasy, halyqtyń aıdyn shalqar ómirlik tájirıbesi, aqyl-oı qazynasy», dedi Serik Negımov.
Tusaýkeser rásimde sóz alǵan ǵalymdar avtordyń otandyq ǵylymdy damytýǵa qosqan úlesi jaıly aıta kelip, bul eńbek bilim alýshy stýdent, magıstrant, doktoranttar men gýmanıtarlyq sala mamandary úshin taptyrmas qural ekenin atap ótti.
«Kitapta avtordyń azamattyq kózqarastary basym. Ár qazaq ǵalymy ǵylymǵa osylaı úles qosýy kerek. Eń bastysy, Abaıdyń shyǵarmalary boıynsha jańa baǵyttaǵy izdenister júrgizilgen», dedi akademık Ýálıhan Qalıjan.
Parlament Senatynyń depýtaty Ǵalıasqar Sarybaev jınaq týraly: «Abaı shyǵarmashylyǵynda onyń maqsatkerlik tulǵasyna tán tálimgerlik, ónegelik qyrlary asa mol. Avtor eńbeginde sonyń bárin calmaqtap-saralaǵan jáne Abaıdyń el birligi, halyq taǵdyry, áleýmettik turmysy týrasyndaǵy asyl oılaryn órbitken», dedi.
