Altyn kúzdiń jyly da jaımashýaq kúnderinde qazaq mádenıeti men óneriniń qasıetti shańyraǵy elordamyz – Astana qalasynyń Mýzykalyq jas kórermen teatry shyraıly Shymkentke gastroldik saparmen keldi. Bul bizdiń ońústik óńiri úshin eleýli oqıǵa boldy dep esepteýge ábden bolady. Eńbek demalysymnyń Astanada ótkizgen kúnderimde ózim tamashalaǵan Mýzykalyq jas kórermen teatry repertýaryndaǵy «Shámshi», «Mahabbat bar ma?», «Shanel №5», «Abaı – Toǵjan», «Ǵashyq júrek», «Gaýhartas» mýzykalyq dramasy teatr súıer qaýymynyń nazaryna usynyldy. Osy atalǵan sahnalyq qoıylymdarmen qýana-qýana qaıta qaýyshtym dep erekshe sezimmen aıta alamyn. Sahna shymyldyǵy zal toly kórermenniń júrekjardy qoshemetimen ashyldy. Janyńa jyly sáýle shýaǵyn uıalatar «Kelshi, aıym» ániniń áýeni de qoıylym barysynan habar bergendeı oı salady. Jazýshy Dýlat Isabekov povesiniń jelisi boıynsha sahnalanǵan «Gaýhartas» mýzykalyq dramasy keremet úzdik qoıylym ekendigi el aýzynda júr. Rejısseri ári teatr dırektory Qazaqstannyń eńbek sińirgen qaıratkeri Ashat Maemırov. Avtorlyq tulǵa men Qaıyrkeń rólin somdaǵan tanymal akter Asylhan Tólepov óziniń tabıǵı daryny men tynymsyz eńbeginiń arqasynda óner shyńyn baǵyndyryp júrgen Mýzykalyq jas kórermen teatrynyń óte talantty akteri.
Spektakldi kórip otyryp, sońynda janyńmen egilip, kóńiliń bosamaýy múmkin emes. Qatal da ór minezdi Tastan, jany názik Saltanat pen sezimtal, aqynjandy Qaıyrkeń kórermen júreginen úlken oryn alady.
«Gaýhartas» mýzykalyq dramasy ulttyq sahna óneriniń zor jetistigi dep aıtýǵa ábden negiz bar. Endeshe, kórermen, «Gaýhartasty» kórelik. Al Mýzykalyq jas kórermen teatry ujymyna, jalpy akterler quramyna, atap aıtsam, Orazaly Igilik, Inabat Rızabekqyzy, Salamat Muqashev, Maqpal Dúısen, Baqdáýlet Orazbek, Ernar Muhambet, Aqqanat Qýandyqov pen Asylhan Tólepovke shyǵarmashylyq tolaǵaı tabystar tileımin.
Ǵazıza ÁLIBAI,
Q.Bektaev atyndaǵy jalpy bilim beretin orta mektep muǵalimi
Túrkistan oblysy,
Ordabasy aýdany
