Buǵan deıingi chempıonattardyń basym kópshiliginde jankúıerler fınalda Jambyl oblysynyń «Áýlıeata» komandasy men Túrkistan oblysynyń «Qulager» komandasyn jıi kóretin. Altyn men kúmis júldeni kezektesip ıelenip júrgen qos komandanyń joly osy chempıonatta jartylaı fınalda túıisti.
Toptyq kezeńde úzdik shyqqan jambyldyqtar men túrkistandyqtar jartylaı fınalǵa da alqynbaı jetti. Shyny kerek, ulttyq sportqa ańsary aýǵan jankúıerler dál osy eki ujymdy fınalda kórgisi kelgen. Alaıda fınaldyq joldamany sarapqa salǵan tartysty kezdesýde ózara myqtyny anyqtaǵan oıynda áýlıeatalyqtar túrkistandyqtardan 3 salym aıyrmasymen aılasyn asyryp, jeńiske bir taban jaqyndaı tústi.
Jalpy alǵanda bul chempıonattyń basty sensasııasyn Qostanaı oblysynyń komandasy tirkedi. Jartylaı fınalda qyzylordalyqtardan basym túsken olar dodanyń kúmis júldegeri atandy. Jambyl men Túrkistan oblysynyń ujymdary fınalǵa ózge komandalardy ótkize bermeıtinin eskersek, soltústik óńirdiń komandasy úshin kúmis júlde tolaıym tabys ekeni daýsyz.
Qazaqstan chempıonatynyń qorytyndysynda jambyldyq komanda 13 dúrkin Qazaqstan chempıony atansa, jartylaı fınalda qostanaılyqtarǵa ese jibergen qyzylordalyqtar men túrkistandyq komanda júldeli úshinshi oryndy qanaǵat tutty. On úshinshi ret chempıon atanǵan «Áýlıeata» kókpar klýby Qazaqstan Respýblıkasy kókpar federasııasy taǵaıyndaǵan 3 mln teńgege ıe bolsa, kúmis júlde ıegeri qostanaılyqtar – 2 mln teńge, úzdik úshtikti túıindegen qyzylordalyqtar men túrkistandyqtar 1 mln teńgeden syıaqy aldy.
Jambyl oblysy
