Kollajdy jasaǵan – Záýresh SMAǴUL, «EQ»
Sentralnaıa kóshesi, №6 úıdiń apattyq jaǵdaıy týraly páter ıeleri jyl ortasynan beri dabyl qaǵyp, tótenshe jaǵdaı qyzmeti men jergilikti bılik arnaıy komıssııa qurýyn suraǵan. Baqsaq, bul másele tek atalǵan baspanaǵa ǵana qatysty emes eken. Dál sondaı jobalyq tehnologııamen salynǵan №2 jáne №8 kópqabatty úıler de (sol kóshede ornalasqan) aldynǵysynyń kebin kıgeli tur. Jergilikti ákimdik dereý komıssııa quryp, arnaıy qurylys uıymy saraptama júrgizdi. Mamandar №6 úıdiń beton plıtalary tigisinen ajyrap, úıdiń qurylysyna úlken nuqsan kelgen degen sheshim shyǵardy. Eń áýeli bul baspananyń jan-jaǵyna metall tirekter qoıyp, qursaýlap tastaımyz dep árekettengen. Alaıda nysan jóndeý júrgizip jatqan ýaqytta qulap ketýi múmkin eken. Sondyqtan úıdi birjola buzý týraly sheshimge keldi. Pavlodar qalalyq tótenshe jaǵdaılar basqarmasy bastyǵynyń mindetin atqarýshy Tilekjan Galıamovtyń aıtýynsha, úı aıtarlyqtaı eski emes, 1989 jyly salynypty. Qurylys normalary durys saqtalmaǵandyqtan osyndaı jaǵdaıǵa jetken.
«Sentralnaıa kóshesi, 6-úıdiń, shyn máninde, tóbesi men irgesi qulaǵaly turǵanyn kórip otyrmyz. Al janyndaǵy ózge eki úıde sonshalyqty kúrdeli ahýal baıqalmaıdy. Mundaǵy 24 páterde 80 adam turyp jatsa, onyń tórteýi – balalar. Turǵyndardyń biraz bóligi páterlerdi ıpotekaǵa alǵan. Ázirshe biz azamattarǵa jaldamaly páterlerdi usynyp otyrmyz. Apattyq jaǵdaıda turǵan baspananyń orny áýeli memleket qajettiligine alynýǵa tıis. Bul prosedýra aıaqtalǵansha turǵyndar ýaqytsha jaldanǵan úılerde turady. Bul jerdegi shaǵyn aýdandy qaıta salý boıynsha birneshe nusqa qarastyrylyp jatyr. Apat aldynda turǵan qos úıdiń de máselesi jaqyn ýaqytta sheshilýi kerek», deıdi Pavlodar qalasy ákiminiń orynbasary Svetlana Gladysheva.
Ákimdiktegilerdiń sózine súıensek, memleket menshigine alynatyn jer telimine (apattyq úı ornalasqan jer) bolashaqta mektep, balabaqsha nemese medısınalyq mekeme salynýy múmkin. Bul úshin eń áýeli naqty josparlaý ázirlenýi kerek. Oǵan shamamen 6-9 aı ýaqyt jumsalady. Jer memleket menshigine alynǵan sátten bastap qazirgi kúni jaldamaly páterlerge kóshirilip jatqan úı ıelerine turaqty páterler satyp áperiledi dep ýáde etilip otyr. Bolmasa páterdiń naryqtyq quny boıynsha aqshalaı ótemaqy tólenedi. Bul adamdar ornynan súrilip tastalǵan Alıýmınıı qalashyǵyndaǵy nemese apattyq úılerde turǵan kópshilikpen birge kezekte turmaıtyny da belgili boldy. Tótenshe jaǵdaıǵa jatatyndyqtan jáne jer memleket menshigine alynatyndyqtan barlyq kómek kezekten tys kórsetiledi.
Turǵyn úı qatynastary bóliminiń basshysy Kenjegúl Joljaqsynova ýaqytsha jalǵa alynatyn páterlerdiń arendalyq aqysyn qala bıýdjeti kóteretinin aıtady. Jyl sońyna deıin bul maqsatqa 15 mln teńge bólingen. Jalǵa tólenetin aqsha turǵyndarǵa berilmeıdi, páterlerdi konkýrs arqyly usynyp otyrǵan fırmalardyń esepshotyna tikeleı aýdarylmaq. Ázirshe apattyq úıden bes otbasy ǵana jaldamaly páterlerge kóshken. Mamandar qonys aýdarý máselesin jedeldetý kerek ekenin eskertip otyr.
PAVLODAR
