«Bıyl Respýblıka kúnin merekeleý aıasynda elordada 200-den astam mádenı-buqaralyq, sporttyq jáne áleýmettik is-sharalar, onyń ishinde merekelik konsertter, avtosherýler, kórmeler, balalarǵa arnalǵan kórikti jerlerge ekskýrsııalar, dóńgelek ústelder, ulttyq sport túrlerinen týrnırler ótkizý, halyqtyń áleýmettik jaǵdaıy tómen toptaryna azyq-túlik sebetin taratý jáne basqa da kóptegen is-sharalar josparlanyp otyr», dedi Ishki saıasat basqarmasynyń basshysy Nurdáýlet Álmuhanov.
Is-sharalar ortalyq alańdarda da, iri obektilerde de, turǵyn úı alaptarynyń aýmaǵynda da, bilim berý uıymdarynda jáne t.b. oryndarda ótedi. Respýblıka kúnine oraı birqatar iri sporttyq is-sharalardy ótkizý josparlanǵan, onyń ishinde 21-22 qazanda konkýrdan Qazaqstan Respýblıkasynyń chempıonaty, 23 qazannan 6 qarashaǵa deıin jastar men jasóspirimder arasyndaǵy bokstan Azııa chempıonaty bar. Kórermender úshin sport jarystaryna kirý tegin.
Mádenıet jáne ónerdi damytý bóliminiń basshysy Aqerke Jumanbaeva elordada josparlanǵan mádenı is-sharalar týraly aıtyp berdi.
23 qazan kúni Astanadaǵy M.Gorkıı atyndaǵy orys drama teatry «Álııa» dramasymen teatr maýsymyn ashady dep josparlanyp otyr.
24 qazan saǵat 18:00-de E.Rahmadıev atyndaǵy Memlekettik akademııalyq fılarmonııada shyǵarmashylyq ujymdardyń qatysýymen merekelik konsert ótedi.
24 qazan «Naz» memlekettik bı teatrynyń «Respýblıkam Qazaqstan» atty merekelik konserti ótedi. Bastalýy 19:00-de.
Sonymen qatar, 24 qazan kúni «Barys Arenada» saǵat 20.00-de qazaq eliniń atyn álemge tanytyp júrgen, birdeı úsh áýenniń basyn qosyp, kúıdiń qudiretin álemge sezindirgen «Ulytaý» tobynyń 25 jyldyǵyna oraı konsert ótedi.
Sonymen qatar, osy kúnderi aýdan ákimdikterimen birlesip, Astana qalasynyń 5 aýdanynyń shet aımaqtaryndaǵy turǵyn alaptarynda merekelik konsertter ótkiziledi.
