Osy jarystyń 3-raketkasy bolyp tirkelgen otandasymyz týrnırdiń jartylaı fınalynda dúnıejúzilik reıtıngte 127-orynda turǵan germanııalyq Maksımılıan Marterermen sheberlik baıqasty. Eki tennısshi buǵan deıin kortta eki márte kezdesip, bireýinde Býblıktiń, ekinshisinde Martererdiń mereıi ústem bolǵan. Al úshinshi kezdesýde jerlesimizdiń baǵy jandy. Bir jarym saǵatqa jalǵasqan matchta A.Býblık eki sette 6:4, 6:4 esebimen jeńiske jetip, týrnırdiń fınaldyq básekesine joldama aldy.
Jerlesimiz á degennen birinshi partııanyń birinshi geımin breıkpen bastap, 2:0 esebimen alǵa shyǵyp aldy. Býblık sol qarqynyn set sońyna deıin báseńdetpeı, eseptegi basymdyǵyn saqtap qaldy – 6:4. Ekinshi sette esep 3:3 bolǵan mezette Býblık taǵy bir breık jasap, bul partııany da 6:4 esebimen túıindedi. Otandasymyz týrnırdiń bas júldesin jartylaı fınalda álemniń 7-raketkasy grekııalyq Stefanos Sısıpasty tize búktirgen fransııalyq Artıýr Fıstpen sarapqa salady. Eki tennısshi buǵan deıin bir-birimen kezdespegen.
