Foto: Aqorda
Memleket basshysy konferensııa qatysýshylaryna iltıpat bildire otyryp, densaýlyq saqtaý jáne medısınalyq-sanıtarııalyq alǵashqy kómek kórsetýdiń halyqaralyq júıesin jetildirý isinde Almaty jáne Astana deklarasııalarynyń mańyzy zor ekenin atap ótti.
«Osydan 45 jyl buryn medısınalyq-sanıtarııalyq alǵashqy kómektiń áleýmettik turǵyda ádiletti modeline negiz bolǵan Almaty deklarasııasy qabyldandy. Bul deklarasııa álemdik densaýlyq saqtaýdyń Uly Hartııasyna aınalyp, kóptegen eldiń halyq densaýlyǵyn jaqsartý úshin shara qabyldaýyna, ony adamnyń irgeli quqyǵy retinde moıyndaýyna túrtki boldy. Almaty deklarasııasy biraz elde ana men bala óliminiń deńgeıin júıeli túrde tómendetý, boljamdy ómir súrý jasyn uzartý úshin sheshýshi ról atqardy. Búginde kóptegen elde ulttyq densaýlyq saqtaý júıesi jolǵa qoıylǵan. Onda medısınalyq-sanıtarııalyq alǵashqy kómekke aıryqsha mán beriledi. Bul bes jyl buryn qol qoıylǵan Astana deklarasııasynda naqtylanady», dedi Prezıdent.
Qasym-Jomart Toqaevtyń aıtýynsha, MSAK júıesi epıdemııanyń alǵashqy belgilerin anyqtaý jáne tosyn syn-qaterlerge qarsy áreket etý isinde mańyzdy ról atqarady
Memleket basshysy qoǵamdyq densaýlyq saqtaý uıymdary ózderiniń ornyqtylyǵyn jáne týyndaǵan jaǵdaıǵa tez beıimdele alatynyn kórsetkenine nazar aýdardy.
Sondaı-aq Prezıdent adamzattyń COVID pandemııasyn eńserýine úles qosqany úshin barlyq medısına qyzmetkerine alǵys aıtty.
Qasym-Jomart Toqaevtyń pikirinshe, barlyq yqtımal qaýip-qaterdi eskere otyryp, densaýlyq saqtaý júıesi kez kelgen kúrdeli jaǵdaıǵa árdaıym daıyn bolýy úshin oǵan qoldaý kórsetý kerek. Aýrý-syrqaýdyń belgilerin bastapqy kezeńinde anyqtaý jáne tosyn syn-qaterlerge der kezinde nazar aýdarý úshin áleýetti arttyra berý qajet.
