Erkindik qyrany, qalyqta!

Oǵan belgili qoǵam qaıratkerleri Zamanbek Nurqadilov, Zamanbek Battalhanuly, etnograf-ǵalym Jaǵda Babalyquly, jýrnalıst Baǵdat Múptekeqyzy bas bolyp, Sársenbek Dáýletbaquly, Aıtbaı Jetibaıuly, Baıjúnis Kódekuly, Moldajan Mámet­uly, Báıteke Tájiuly, Áben Toqtasynuly, Seıtjan Baıjúnisuly, Sháken Oshanbaıuly, Ábilhaq Turdy­baıuly sekildi birqatar qusbegi at­­sa­lys­qan bolatyn. Sodan beri 35 jyl ishinde qusbegiliktiń órisi keńeıip, elimizde ǵana emes, shetelderge de tanymal bolýyna ulttyq ónerdiń janashyry, belgili jýrnalıst Baǵdat Múptekeqyzy bastaǵan ultjandy adamdardyń qosyp kele jatqan úlesi ushan-teńiz. Eleýli eńbektiń arqasynda Almaty oblysynan bastaý alǵan ıgi shara nátıjesinde respýblıkadaǵy barlyq ulttyq sport mektebinde «Qusbegilik» bólimderi ashylyp, bul kúnde jas býyndy qyran baptaýǵa baýlyp keledi.

Jýyrda Aqaı Núsipbekov atyndaǵy aýyl mańaıyndaǵy «Qulaǵan jar» taýynyń baý­raıynda «Jalaıyr Shora» mektebiniń qurylǵanyna 35 jyl tolýyna oraı jáne babalar murasyn jalǵastyrýshy, qusbegilik ónerdiń órken jaıýyna birden-bir muryndyq bolǵan Sársenbek Dáýletbaqovtyń osy salaǵa sińirgen eńbegin aıryqsha atap ótý maqsatynda «Salbýryn – 2023» halyqaralyq qusbegiler týrnıri uıymdastyryldy.

«Qusbegi mektebiniń negizin qalaýshy Sársenbek Bármenbekuly atamyz sharýashylyqta shopan bola júrip, júırik at jaratyp, otyz jyldaı qolynan qyran qusyn tastamaǵan. Keńestik kezeńniń ózinde japon, fransýz kınogerlerin tańǵaldyryp, qasqyr, elikten basqa, orman ishindegi sileýsinge búrkitin túsirip, qazaq elin shetelderge tanytqan áıgili búrkitshi. Qazaq qusbegilik ónerinde óziniń «Altaıdyń aqıyǵy», «Táńirtaýdyń Muzbalaq qarasy», «Dalanyń altyn sarysy» syndy qyrandarynyń qasıetin tanyp, qadirine qanyǵyp ósken ónegeli jan. Sonymen qatar júırik atqa altynmen aptalǵan, kúmispen kúptelgen er-turman jasap, áıelderdiń áshekeı buıymdaryn soǵyp aty shyqqan zerger Sársenbek ata jigitke tán jeti ónerdi ıgergen sal-serilerdiń sońǵy tuıaǵy edi», degen respýblıkalyq «Qusbegilik» fede­rasııasy QB vıse-perzıdenti Baǵdat Múptekeqyzy babadan qalǵan ulttyq qundylyq, bekzat ónerdi keıingi urpaqqa amanat etip qaldyrý, uzaq jyldar boıy tasada qalǵan eleýli esimdi qaıta jańǵyrtý jáne halyqaralyq deńgeıge kóterý maqsatynda ótken jyly bel­gili telejýrnalıst Berik Ýálıdiń basshylyǵymen respýblıkalyq «Qus­be­gilik» federasııasy qoǵamdyq bir­les­tiginiń qurylǵanyn atap ótti. Sonyń negizinde bul Almaty oblysynda alǵash ret halyqaralyq deńgeıde ótip otyrǵan týrnır.

Týrızm jáne sport mınıstrligi Deneshynyqtyrý jáne sport komıteti, «Samuryq-Qazyna» ÁQ, Sport qory, Ulttyq sport qaýymdastyǵy, respýblıkalyq «Qusbegilik» federasııasy QB, Almaty oblysynyń ákimdigi men «Qyran» federasııasy qoǵamdyq qory uıymdastyrǵan «Eskirmeıtin esimder» atty joba aıasynda ótken bul týrnırge elimizden, Túrkııa, Mońǵolııa, Qytaı, Qyrǵyzstannan kelgen 70-ten asa qusbegi qatysyp, baqtaryn synady.

Qyran qalyqtaǵan halyq­ara­lyq­­ týrnırdiń ashylý saltanatyna­ Almaty oblysy ákiminiń birinshi orynbasary Nurlan Ábdirahym, Kegen aýdanynyń ákimi Nurbaqyt Teńizbaev, qusbegilikten memlekettik jattyqtyrýshy Bazarbek Kúntýǵanuly, Almaty oblysynyń deneshynyqtyrý jáne sport basqarmasynyń basshysy Erbolat Sarabekov pen Qurmetti sport qaıratkeri, respýblıkalyq «Qusbegilik» federasııasynyń vıse-prezıdenti Baǵdat Múptekeqyzy qatysyp, dala qyran­darynyń qyr-syrynan syr shertti jáne jarysqa qatysýshy qusbegilerge sáttilik tiledi.

Týrnır kestesinde kórsetilgen úsh­ atalym boıynsha, atap aıt­saq, búrkittermen, qarshyǵa jáne ıtel­gi­lermen ań aýlaýda aldyna qara salmaǵan qyrandar anyqtaldy. Búrkitter jarysynda 1-oryndy Astanadan kelgen qusbegi Kúntýǵan Serikbektiń «Alǵyry» alsa, qarshyǵalar jarysynda 1-oryndy Jambyl oblysynyń qusbegisi Babajan Berikbolsynnyń «Qoımasy» ıelendi. Al ıtelgiler synynda 1-oryndy astanalyq Erasyl Serikbekulynyń «Qarakózi» qanjyǵalady. Dala tósin qıqýlatyp, júzdegen jankúıerdiń qyzyǵýshylyǵyn arttyrǵan týrnır qorytyndysynda jeńimpazdar arnaıy kýbok, medal jáne baǵaly syılyqtarmen marapattalyp, mereıleri ústem boldy.

Almaty oblysy