Bıyl medısına salasyna jańa tehnıka satyp alýǵa jergilikti bıýdjetten 4,7 mlrd teńge bólingen. Bul medısınalyq jabdyqtarmen jaraqtandyrý deńgeıin 93,5 paıyzǵa jetkizýge múmkindik beredi. О́ńirde «Aýyldyq densaýlyq saqtaýdy jańǵyrtý» ulttyq jobasy aıasynda 18 medısınalyq-sanıtarlyq kómek nysanyn salý qarastyrylǵan. Onyń úsheýin jyl sońyna deıin paıdalanýǵa berý kózdelgen. Al 15 nysannyń qurylysyn kelesi jyly bastaý josparlanyp otyr.
«Jergilikti bıýdjet esebinen 19 nysannyń qurylysyn salý josparlanǵan edi. Jyl sońyna deıin 12 nysannyń qurylysy aıaqtalady. Al 5 nysannyń qurylysy 2024 jyly bastalady. Atyraý qalasyndaǵy «О́rken» jáne «Nursaıa» shaǵyn aýdanynda kúnine 250 pasıent qabyldaıtyn 2 emhananyń qurylysyn jedeldetýge sheshim qabyldandy. Sol sebepten, jergilikti bıýdjetten qarajat qarastyrylyp, qurylys jumystary qolǵa alyndy», deıdi S.Shápkenov.
Sondaı nysannyń biri Atyraý qalasyndaǵy «Bereke» shaǵyn aýdanynda ashyldy. Oblys ákiminiń orynbasary Jasulan Bısembıevtiń aıtýynsha, dárigerlik ambýlatorııa memlekettik baǵdarlama aıasynda salynǵan.
«Memlekettiń ustanyp otyrǵan basym baǵytynyń biri – halyqtyń saýlyǵyn arttyrý, medısınalyq kómekke qoljetimdilikti qamtamasyz etý. Sol sebepten, oblys ákimdigi qoldanystaǵy nysandardy jańartyp, jańa emdeý oryndaryn salýǵa basa nazar aýdaryp otyr», dedi J.Bısembıev.
Atyraý qalalyq №3 emhananyń dırektory Aıman О́tegenovanyń málimetine súıensek, jańa ambýlatorııanyń 33 kabıneti zamanaýı kompıýterlik tehnıkamen, ınternetpen tolyq jabdyqtalǵan. Dárigerlik ambýlatorııa 7 myńnan asa pasıentti qabyldaýǵa eseptelgen. Bir aýysymda 80 pasıent qabyldanady. Munda jalpy tájirıbelik dárigerlerge 5 kabınet qarastyrylǵan. Sondaı-aq kúndizgi stasıonar, egý jáne emdeý, gınekologııa, stomatolog, dárigerge deıingi qaraý kabıneti, deni saý balalar bólmesi, 8 kereýetti kúndizgi emhana jumys isteıdi.
«Osy kezge deıin Atyraý qalalyq №3 emhananyń dárigerleri «Bereke» shaǵyn aýdanynyń turǵyndaryna medısınalyq qyzmetti kórsetip keldi. Endi otbasylyq-dárigerlik ambýlatorııada qyzmet kórsetýge tolyq jaǵdaı jasaldy», deıdi A.О́tegenova.
Oblys ákiminiń deregine qaraǵanda, bıyl 6 aıda 406 shaǵym túsken. Onyń ishinde 74 shaǵymda kórsetilgen jaıttyń negizdi ekenine dálel tapqan. Al 73 shaǵymdaǵy aıtylǵan derekter ishinara negizdi dep sanalǵan. Biraq 259 shaǵymnyń negizsiz ekeni anyqtalyp otyr. Ákim shaǵymdarda kórsetilgen kemshilikterdi joıý, aldyn alý maqsatynda medısınalyq-sanıtarlyq kómek qoljetimdiligin jaqsartý, medısınalyq kómek sapasyn arttyrý sharalaryn baqylaýyna alǵan.
«О́ńirdiń medısına salasynda kadr tapshylyǵy áli de bar. Jyl basynda 185 mamannyń jetispeıtini anyqtalǵan edi. Osy kezge deıin 102 maman jumysqa qabyldanyp otyr. Bıyl jergilikti bıýdjet esebinen 39 medısınalyq jedel járdem kóligi satyp alyndy. Jańa kólikter jeltoqsan aıynda jetkiziledi. Qyrkúıek aıyna deıin saqtandyrylmaǵan adamdar sany – 74 876. Bul kórsetkish ótken jylmen salystyrǵanda 17,6%-ǵa tómendedi. Respýblıkalyq bıýdjetten ambýlatorlyq dári-dármekpen qamtamasyz etý úshin 5,6 mlrd teńge bólinip, dári-dármekpen qamtamasyz etilip otyr. Jergilikti bıýdjetten 301 mln teńge qaralyp, dárilik zattarmen 108 naýqas qamtamasyz etildi», dep málimdedi S.Shápkenov.
Atyraý oblystyq balalar aýrýhanasynyń dırektory Nurqabyl Aıtmuhambetovtiń aıtýynsha, jaqynda kópfýnksıonaldy 115 kereýet satyp alynǵan. Oǵan jergilikti bıýdjetten bólingen 127 mln teńge jumsalǵan.
«Eleganza modelinen kópfýnksıonaldy 15, LISA markaly 100 kereýet balalar aýrýhanasyna jetkizildi. Elektrondy rettegishi bar arnaıy tósek naýqasty stasıonarlyq emdeý mekemelerine arnalǵan. Kereýetke ıntýıtıvti tańbalary bar basqarý blogi ornatylǵan. Bul meıirbıkelerdiń pasıentke kúndelikti kútim jasaýyn jeńildetedi. Kereýet jeńil jáne yńǵaıly, naýqas úshin jaılylyqty qamtamasyz etedi. Ámbebap kereýetterdiń 100-i bólimderge bólinse, 15-i jansaqtaý bólimine ornatyldy», dedi N.Aıtmuhambetov.
Bul aýrýhanaǵa 17 mln teńgeniń kranıotom qurylǵysy syıǵa berildi. Ony satyp alýǵa munaı kompanııasy demeýshilik kórsetken. Aýrýhananyń neırohırýrg dárigeri Shoder Áripovtiń aıtýynsha, kranıotom – bas súıekti burǵylaý, alynbaly súıek qaqpaǵyn jasaý úshin qoldanylatyn ámbebap hırýrgııalyq qurylǵy.
«Bul qurylǵynyń bas jáne mı jaraqatyn emdeýge kómegi kóp. Máselen, dárigerdiń anyqtaǵan dıagnozyna baılanysty qan uıý men isikti joıýǵa, qan tamyrlaryn qalpyna keltirýge bolady. Dárigerlerdiń túrli operasııany sátti jasaýy úshin osyndaı ozyq qural-jabdyqtar qajet. Ásirese bas súıegine operasııa jasaý kezinde zamanaýı tehnologııanyń mańyzy erekshe ekeni baıqalady. О́ıtkeni neırohırýrgııada medısınalyq tehnologııalar arqyly joǵary nátıjelerge qol jetkizýge bolady. Endi qıyn operasııalardy osy aspaptyń kómegimen ońaı jasaýǵa múmkindik bar. Sebebi bul qurylǵy jaraqatty azaıtady», dedi Sh.Áripov.
Atyraý oblysy
