Jýyqta metallýrgter dınastııasynan Rınat Erbolovpen az-kem áńgimelesken edik. Aıtýynsha, «Kazsınk» JShS Rıdder metallýrgııalyq kesheninde jumys istep júrgenine bıyl 13 jyl bolypty. Á, dep jumysqa ornalasqanda №1 kúkirt qyshqyly sehynda apparatshy bolǵan. Keıingi 3 jylda velspesh sehyna aýysqan.
– Naǵashy atam Málik Aýshınov osy zaýytta 1973 jyly jumysqa turyp, sol jerden zeınetke shyqty. Anamnyń týǵan aǵalary da osy zaýytqa jumys istegen. Bólelerim de metallýrgııa salasynda jumys istep júr. Oraıy kelgende naǵashy jezdem Orazqul Esenovtiń eseli eńbegin atap óteıin. Zaýytta sheber bolǵan ol kóptegen azamatty jumysqa baýlyp, jastarǵa úıretýden aıanbady. Málik atamyzdyń 10 balasy boldy. Búginde onyń jolyn jalǵap júrgenimizdi maqtan etemiz, – deıdi Rınat Erbolov.
Rınattyń negizgi mamandyǵy – alǵashqy áskerı daıyndyq jáne dene shynyqtyrý pániniń muǵalimi. Muǵalim bolyp, bar-joǵy bir jyl ǵana eńbek etken. Eńbek jolyn bastaı sala ásker sapyna alynyp, Aqtaýdaǵy teńiz jaıaý áskerinde boryshyn ótegen. Keıin kelgennen keıin birden zaýytqa jumysqa ornalasqan. Basynda jumystyń qıyn bolǵanyn da jasyrmaıdy.
– Zaýyttyń aty – zaýyt. Jumys ońaı emes. Farhad esimdi bólem ekeýimiz bir sehta istedik. Ol meniń tálimgerim boldy. Sosyn men velspesh sehyna aýysyp kettim. Zaýyttaǵy búkil peshtiń júıeli jumys isteýine jaýaptymyz. Kórsetilgen temperatýralyq rejimdi ustap otyrýymyz kerek. Úsh kún istep, eki kún demalamyz, – deıdi ol áńgimesinde.
Ystyq peshtiń janynda segiz saǵat ot kósep, pesh tazalaý ońaı sharýa emes ekeni belgili. Onyń ústine lapyldap janyp turǵan peshtiń temperatýrasy +900 gradýsqa deıin jetedi. Rınat jasóspirim kezinde erkin kúreske qatysyp, sport sheberligine úmitker atanǵany bar. Sol kezdegi jattyǵýdyń da paıdasy bolar, az ýaqyt ishinde zaýyt jumysyna tóselip ketken.
Oqýdy jańa bitirgen jastardyń keıbireýi mundaı jumysty aýyrsynsa, endi biri úırenip ketip jatady. Rınat Erbolov sekildi ákki mamandar olarǵa bilgenin úıretedi, jol nusqaıdy. Ásirese qaýipsizdik erejelerin qaıta-qaıta esine salyp otyrady. Sebebi seh ishindegi qate qadam keshirilmeıdi.
– Málik atamyz Keńes úkimeti tusynda jumys istedi. Ol ýaqytta aýyr jumystaǵylar zeınetke erte shyǵatyn. Qyzmetine qaraı qosymsha aqy da tólendi. Zaýytta qaýipsizdik talaptary 100 paıyz saqtalady degenimizben, jumysshylardyń densaýlyǵyna zııany tıedi. Sol úshin zaýytta isteıtin er adamdar zeınetke – 60, áıelder – 55 jastan shyqqany durys pa dep oılaımyn. Áıtpese, jumys óte aýyr, – degen usynysyn da bildirdi.
Bul jalǵyz R.Erbolovtyń usynysy emes shyǵar, bálkim. Zeınetkerlik jasyn qarastyrýdy qolynan kúrek túspeı júrgen búkil zaýyt qyzmetkerleri qoldasa kerek. Bul – endi ýaqyt enshisinde. Al ata jolynan jańylmaı kele jatqan Rınat eki qyz tárbıelep otyr. Jary – dúkende qarapaıym satýshy. Jumystan bos ýaqytta otbasysymen Batys Altaıdyń kórikti jerlerin aralap, tabıǵat aıasynda tynyqqandy unatady. Áńgime arasynda Rınat balalary bolashaqta zaýytta eńbek etse, jol kórsetip, belin býamyn degen pikirin de bildirdi.
Shyǵys Qazaqstan oblysy,
Rıdder qalasy
