1990 jyldyń 25 qazanynda Qazaq KSR Joǵarǵy keńesiniń sheshimimen elimizdiń egemendigin aıqyndaıtyn deklarasııa qabyldandy. Osy aıtýly kún Qazaqstannyń derbestigin tanytatyn qujatpen naqtylanyp, tarıh tórinen oryn aldy. Bul deklarasııa aıasynda Qazaqstan ózin jeke respýblıka retinde jarııalap, memlekettik shekarasyn, azamattyǵy, qarjylyq áleýeti, halyqaralyq qatynastardaǵy derbestigi, memlekettik rámizderin bekitýge batyl qadam basty. Sonymen qatar respýblıkamyzdyń saıası-ekonomıkalyq turaqtylyǵyn berik saqtap, memlekettiń damý kezeńderiniń alǵysharttaryn bekitti.
Deklarasııa arqyly álem kartasynan ornyn qalyptastyrǵan jańa memleket – Qazaqstan Respýblıkasynyń negizi qalanǵanyn qazirgi urpaq býyny, ıaǵnı táýelsiz elimizdiń erteńgi azamattary álden bilip-ósýge tıis. Bul – bárimizdiń ortaq qasıetti de qasterli boryshymyz. Elimizdiń táýelsizdik jolyndaǵy tuńǵysh qadamy osy deklarasııany qabyldaý arqyly júzege asqany barlyǵymyzdyń oıymyzda ár kez jańǵyryp turýǵa tıis.
Bul kúnniń ártúrli sebeptermen, on jyldan asa ýaqyt boıy el kóleminde atalmaı kelgendigin de jasyrýǵa bolmaıdy. О́tken jyldan bastap Memleket basshysy Qasym-Jomart Toqaev ádiletti Qazaqstan qurý ıdeıasyn, onyń damý joldaryn halyqqa túsindire kele, 25 qazandy Respýblıka kúni retinde jarııalap qana qoımaı, oǵan ulttyq mereke mártebesin qaıtarýdy usynǵany el kókeıinde júrgen jaıdy dóp basty. Álem elderiniń arasynda ózindik jolyn tapqan respýblıkamyzdy odan ári qaraı da órkendetýge birge atsalysa bereıik.
Ernar SEIDIMBEK,
Ádilet departamentiniń basshysy
Abaı oblysy
