Elim, jurtym, Qazaqstanym táýelsizdik alǵandaı sezimde boldym. Deklarasııadan keıin kóp uzamaı Otanymyz derbes respýblıka retinde táýelsizdigin jarııalady.
Buryn Táýelsizdik kúni retinde atalyp kelgen eldik toıynyń mán-mańyzy erekshe. Halyq pen ult bolýdyń eń ozyq, jetilgen úlgisi – respýblıkaǵa aınalý. Túbi eldik pen teńdikti kóksegen halyq erkindigi men eldik múddesi, adamdarynyń qadir-qasıeti zańmen qorǵalatyn respýblıka bolmaı qoımaıtynyn ýaqyt dáleldedi. Adamdary teń quqyly demokratııaly memleket bolǵanǵa ne jetsin! Demek, eldiktiń kemel úlgisi retinde respýblıkany áıgilep, respýblıka bekigen kúndi tóbemizge tutpaı ne kórinipti? Merekeniń máni men salmaǵy osydan-aq belgili.
Qazaq eldigi men memleketi belgilengen ataýly kún barsha jurttyń ulttyq merekesi bolyp belgilengende, meniń de keýdemdi maqtanysh sezimi kernedi. Meniń respýblıkam, Otanym, jurtym dep tebirenbegen jan eshqashan tolyq adamǵa aınalmaq emes. Ondaılardyń saıda sany, qumda izi qalmaıtynyn tarıh áldeqashan dáleldegen. Bizdiń respýblıka, uly Otan, ulan-baıtaq Qazaqstan kózimizdiń qarashyǵy, keýdemizdegi júregimiz bolyp soǵyp turýǵa tıis. Sonda ǵana tatýlyq pen birlik, eldik pen teńdik óris jaıady. Eldigi bar yntymaqty jurttyń irgesi qashanda berik. Respýblıka kúni – ult merekesin solaı túsinýimiz kerek. Respýblıkamyzdyń dańqy asa bersin!
Toqtar ÁÝBÁKIROV,
qazaqtyń tuńǵysh ǵaryshkeri
