Kezdesý barysynda Premer-mınıstr Qazaqstan Respýblıkasynyń Úkimeti Ońtústik Koreıamen saýda-ekonomıkalyq yntymaqtastyqty odan ári damytýda úlken perspektıvalar kóretinin atap ótti. Atap aıtqanda, buǵan taýar aınalymynyń serpindi ósýi dálel: byltyr ol 2,3 ese ósip, 6,1 mlrd dollardan asty, al bıylǵy jyldyń 8 aıynda taǵy 11%-ǵa artty.
«О́zara saýda nomenklatýrasyn keńeıtý úshin birlese is-áreket etý kerek dep sanaımyn. Bul jerdegi mańyzdy qural – Qazaqstan-Koreıa saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa. Aldaǵy ýaqytta onyń jumysyn jandandyryp, kezekti otyrysyn ótkizý qajet dep oılaımyn», dedi Álıhan Smaıylov.
Sondaı-aq ol Ońtústik Koreıa elimizdiń ekonomıkasyndaǵy iri ınvestorlardyń top-10-dyǵynyń qatarynda ekenin atap ótti. Atap aıtqanda, sońǵy 18 jylda Qazaqstanǵa 9,2 mlrd dollarǵa jýyq ınvestısııa tartylǵan. Al byltyr Koreıadan kelgen tikeleı ınvestısııanyń jalpy kólemi 85%-ǵa ósip, jańa rekordtyq – 1,5 mlrd dollarǵa jetti.
Premer-mınıstrdiń sózinshe, qazirgi ýaqytta elimizde 700-den astam koreıalyq kásiporyn jumys isteıdi, olardyń ishindegi iri kompanııalar – KIA, Hyundai, Samsung jáne LG.
«Búginde jalpy quny 1,5 mlrd dollar bolatyn 5 joba júzege asyrýǵa daıyn jáne jalpy quny shamamen 500 mln dollaryq taǵy 25 perspektıvalyq joba ázirlenip jatyr. Aıqyn mysal retinde, Qostanaıdaǵy jylyna 70 myń avtokólik óndirýge qýaty bar, ınvestısııa kólemi 190 mln dollar jańa iri KIA zaýytynyń qurylysyn ataýǵa bolady», dedi Álıhan Smaıylov.
Ol Qazaqstan Úkimeti aldaǵy ýaqytta da ınvestorlardyń elimizde jaıly jumys isteýi úshin barlyq qajetti jaǵdaıdy jasaıtynyn aıtty.
О́z kezeginde An Dok Gyn Ońtústik Koreıa Qazaqstanmen ekonomıkanyń ártúrli salasy boıynsha belsendi tehnologııalyq yntymaqtastyqqa daıyn ekenin atap ótti.
«Qazaqstandaǵy KIA zaýyty sııaqty jobalardyń mańyzy zor. Eger ol sátti júzege asyrylsa, Qazaqstannyń avtomobıl ónerkásibi úlgige aınalmaq. Bul basqa da osyndaı zaýyttar men óndiristerdiń qurylysyna yqpal etedi», dedi Ońtústik Koreıanyń saýda mınıstri.
