Is-sharany QR Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýtynyń MediaLab ortalyǵy Maqsut Narikbayev University-men birge uıymdastyrdy.
Semınardyń ashylý saltanatyna QR Mádenıet jáne aqparat mınıstrligi Azamattyq qoǵam isteri komıteti tóraǵasynyń orynbasary Perızat Sádýaqas, Maqsut Narikbayev University AQ Basqarma tóraǵasynyń orynbasary Erbolat Muhamedjan, Qazaqstandyq qoǵamdyq damý ınstıtýtynyń Basqarma tóraǵasy Nurbek Matjanı qatysty.
Aldymen, Perızat Sádýaqas qatysýshylarǵa sáttilik tilep, semınardyń mańyzyna toqtaldy.
«Memleket saıasatyn júzege asyrýda, daǵdarys jaǵdaılarynda jáne «Halyq únine qulaq asatyn memleket» qaǵıdasyna sáıkes, qoǵamdy tyńdaý, túsiný, tildesý kezinde baspasóz qyzmeti erekshe ról atqarady. Sondyqtan búgingi shara qoǵammen baılanys salasyndaǵy túrli trendter talqylanatyn, óńirden jáne ortalyqtan kelgen mamandar jańa aqparat alyp, tájirıbe almasatyn alań bolady dep esepteımin», dedi spıker.
Semınar barysynda qatysýshylar qoǵammen ózara baılanys ornatý ədisterin, jalǵan aqparatpen kúres maqsatynda BAQ ókilderine naqty málimet usyný tetikterin, daǵdarys jaǵdaılaryndaǵy oqıǵalardy taldaý jáne jańa kommýnıkasııalyq tehnologııalar men PR quraldaryn qoldaný joldaryn talqylady.
Atap aıtqanda, Voice Power sarapshysy, iskerlik kommýnıkasııa salasynyń treneri, jýrnalıst Rýslan Idırısov «Kelissózder - tıimdi kommýnıkasııanyń mańyzdy faktory» taqyrybynda ýorkshop ótkizdi. Ol baspasóz qyzmeti mamandary úshin taım-menedjment pen ózin-ózi tanystyrýdyń mańyzyn atap ótti.
Odan bólek, sheteldik sarapshy, Off the Record Strategies strategııa jəne kommýnıkasııa baǵytynda qyzmet kórsetetin kompanııanyń prezıdenti Mark Pfaıfl «Shyndyqty qutqarý: postfaktým dəýirindegi kúres» ýorkshobynda faktchek jasaýdyń qadamdaryna toqtaldy. Ol AQSh-taǵy baspasóz qyzmetin negizge ala otyryp, osy sala mamandary úshin aqparat almasýdyń mańyzy men birlesip jumys isteýdiń qajettigin, sondaı-aq qoǵamnyń senimine ıe bolý máselesin qozǵady.
Al TedxAstana treneri, qoǵammen baılanys salasynyń sarapshysy Saltanat Áskerbekqyzy «Tıimdi kommýnıkasııalar: qaqtyǵystardyń sıpaty jəne tabys faktorlary» ýorkshobynda kommýnıkasııa saıasaty, strategııasy jáne baspasóz qyzmetiniń medıa-jospary degen baǵyttardy qamtydy.
Semınardyń sońǵy ýorkshobyn Innovasııalyq psıhologııa jáne konsaltıng ınstıtýtynyń dırektory Gúlmıra Aıapbergenova aıaqtady. Kópshilik aldynda sóıleý óneri týraly aıtqan spıker qatysýshylardyń keısterin taldap, daıyndyq kezeńinde eskerý kerek qadamdarǵa toqtaldy.
Eske salaıyq, semınar memlekettik organ ókilderiniń qoǵammen jáne BAQ ókilderimen ózara qarym-qatynas ornatýyna qajetti kommýnıkasııa daǵdylaryn jetildirý maqsatynda uıymdastyryldy.
Is-sharaǵa óńirlik jáne ortalyq memlekettik organdardyń 25 ókili qatysty. Olarǵa semınar sońynda sertıfıkat tabystaldy.
