Kenshiniń aıtýynsha, jumys barysynda jarylys bolatyndaı esh qurylǵy syr bermegen.
«Men jeldetý jáne qaýipsizdik tehnıkasynyń taý-ken sheberimin, bul lavada kezekshilikte boldym, órt bolatyndaı eshqandaı sebep bolǵan joq. Munyń qaıdan shyqqanyn eshkim bilmeıdi, qurylǵylardaǵy kórsetkishter qalypty boldy, bári aıaqasty boldy», dedi Iýrıı Korenkov.
Ol jarylys bolardyń aldynda kezekshiligin tapsyryp, kenishten 12 mınýt buryn shyǵyp úlgergen eken.
«Kenshiler aýysymdy tapsyryp, birer mınýt sóılesip, úıimizge qaıttyq. Al basqa aýysym jigitteri jumystaryna endi kirisip jatty. Kletke (shahtadan kóteretin jabdyq) deıin ádettegideı tramvaımen bardyq. Biz túngi 02:23-te shahtadan shyqtyq, al jarylys 02:35-te boldy», dedi Iýrıı Korenkov.
Ol sondaı-aq tiri qalǵan áriptesteri bólisken keıbir derekterdi de aıtyp berdi.
«Meniń kúıeý balam tórtinshi aýysymǵa kirisken bette jarylys tolqynyna tústi. Aýyr soqqyǵa ushyraǵan eki jumysshyny qutqaryp qaldy. Ekeýine de ózin-ózi qutqarý qurylǵysyn kıgizip, aman alyp qalǵan. Biriniń esimi Vıktor Plotnıkov, ekinshisiniń aty Iýrıı, famılııasy esimde joq. Olardy zvenoshy Aleksandr Aleksandrovıch Kladko qutqardy. Vıktor Plotnıkov basyn qatty soǵyp, zaqym alǵan. Qazir ol Maqajanov atyndaǵy kópsalaly aýrýhanada jatyr», dedi ol.
