Taıpaq – ejelden álemge áıgili sportshylar kóp shyqqan óńir. Sambodan tórt dúrkin álem chempıony Erbolat Baıbatyrov, grepplıngten halyqaralyq dárejedegi sport sheberi, álem chempıony Zaıreden Muhambetjanov, qol kúresinen Qazaqstan sport sheberi, jastar arasynda álem chempıony Kenjeqyz Qaýpenova, bokstan Azııa chempıonatynyń kúmis júldegeri Danıal Sábıt, qol kúresinen Azııa kýboginiń jeńimpazy Izbasar Nurbol, álem chempıonatynyń kúmis júldegeri Bolatbek Raıymqulov, sambodan álem chempıonatynyń júldegeri Baǵdat Jarylǵasov, sambodan jastar arasynda álem chempıonatynyń kúmis júldegeri Armat Qabdolov t.b. maıtalmandar shyqqan óńirde ashylǵan sý jańa 160 oryndyq deneshynyqtyrý-saýyqtyrý kesheni «Qarashyǵanaq Petrolıým Opereıtıng B.V» kompanııasy esebinen bólingen qarajatqa turǵyzylǵan.
– Memleket basshysynyń tapsyrmasyn oryndaý aıasynda oblysta 11 deneshynyqtyrý-saýyqtyrý kesheni qoldanysqa berilse, búgin sý jańa ǵımarat Taıpaq
aýylynda ashylyp otyr. Endi jas sportshylar zamanaýı sport kesheninde jattyǵyp, kásibı sheberligin shyńdap, álemdik saıystarda joǵary jetistikke qol jetkizip, el úmitin aqtaıdy dep senemiz. Jańa sporttyq nysan el atyn máshhúr etken aǵa býyn sportshylar salyp ketken sara joldy jalǵar chempıondar ustahanasyna aınalsyn, – dedi keshenniń ashylýyna arnaıy qatysqan Batys Qazaqstan oblysynyń ákimi Narıman Tóreǵalıev.
Al Aqjaıyq aýdanynyń ortalyǵy Chapaev aýylynda ashylǵan sport kesheni 320 adamǵa arnalǵan. Keshenniń birinshi qabatynda aýyr atletıka bólmesi, boks rıngi, arbadaǵy múgedekterge arnalǵan oryndar bolsa, ekinshi qabatynda kúres zaly men doıby, shahmat, toǵyzqumalaq oınaıtyn bólme bar. Sporttyq nysanda halyqtyń sportpen shuǵyldanýy úshin barlyq jaǵdaı jasalǵan. О́ńir basshysy «sport kesheni ár turǵyn úshin qoljetimdi bolady» dep málimdedi.
Batys Qazaqstan oblysy
