Ǵalamtordaǵy ashyq derekterge súıensek, Ivan Akımovıch Kostenko 1892 jyly 27 mamyrda Donbassta, Chıstıakovskıı aýdanynda dúnıege kelgen, 1934 jyly 27 shildede Qazaqstandaǵy Balqashtyń mańynda ómirden ozypty. Qaraǵandy kómir basseınin ıgerýdi uıymdastyrýshylardyń biri.
"Ol shahter otbasynda týdy. Máskeý ónerkásip akademııasyn bitirgen (1932). 1918-1920 jyldary brondy poıyzdyń komandıri boldy, Donbassty qorǵaýǵa qatysýshy. 1920-1928 jyldary partııa-memlekettik jumysta istegen, 1931-1933 jyldary Donbasstaǵy kómir tresi bastyǵynyń orynbasary, 1933-1934 jyldary «Qaraǵandykómir» tresinde basqarýshy qyzmetin atqardy", delingen jazbada.
Onyń qatysýymen № 30, 31, 33/34 jáne № 20 shahtalar irge qalady, Qaraǵandy basseıninde kómir óndirýdi damytý men tehnologııasynyń júıesi quryldy, Qaraǵandy qalasynyń jańa turǵyn aýdany salyndy. 1934 jyly 27 shildede ushaq apatynan qaıtys boldy. Qaraǵandyda bir kóshe men shahtaǵa Kostenko esimi berilgen.
«ArselorMıttal Temirtaý» AQ málimetteri boıynsha 1934 jyly 13 tamyzda «Gıgant-A» kenishine ushaq apatynan qaza tapqan «Qaraǵandykómir» tresiniń basqarýshysy Ivan Akımovıch Kostenkonyń esimi berildi. Kenish 1942 jyly iske qosyldy.
Ashyq aqparat kózderine súıensek, Ekinshi dúnıejúzilik soǵys kezinde kenish ýaqytsha ıgerý shemasy boıynsha jumys istegen. 1952 jyly 26 mamyrda jobalyq qýaty jylyna 750 myń tonna kómir óndiretin shahtanyń birinshi kezegi iske qosyldy. 1962 jyly dál osyndaı qýattylyqtyń ekinshi kezegi engizildi.
1968 jyly 1 qańtarda 86/87 shahta Kostenko atyndaǵy shahtaǵa qosyldy, odan keıin qaıta qurý jáne óndiristik qýattylyq 3 mln 200 myń tonnaǵa deıin ósti. 1984 jyly kenishtiń búkil tarıhynda eń kóp kómir óndirildi – 3 mln 942 myń tonna. 1992 jyly 7 mamyrda shahta ujymy 100 mıllıonynshy tonna kómir óndirdi.
1996 jyldan bastap kenish «ArselorMıttal Temirtaý» AQ (burynǵy «Ispat Karmet» AQ, «MıttalStıl Temirtaý» AQ) kómir departamentiniń quramyna endi.
1998 jyly 1 qańtarda «Stahanovskaıa» shahtasy Kostenko atyndaǵy shahtaǵa qosyldy. Kenishte óndiriletin kómirdiń sorttary - 2KO, 1KO, 1K.
2018 jyldyń 10 naýryzynda ventılıasııalyq túıispe aımaǵyndaǵy Kostenko shahtasynda órt boldy. Sodan keıin barlyq shahta jumysshylary jer betine kóterildi, zardap shekkender joq.
2022 jyldyń sáýirinde 36 jastaǵy kenshi qaıtys boldy. Ol 2 sáýirde lavada jumys istegen kezde ómirine qaýip tóndiretin jaraqattar alǵan.
1938-2013 jyldar aralyǵyndaǵy Qaraǵandy kómir basseıniniń ashyq estelik kitabynda Kostenko shahtasynda qaza tapqan 80-nen astam adam týraly derekter bar.
2023 jyldyń 28 qazanynda shahtada jarylys boldy. Qazirgi aqparat boıynsha, jarylys saldarynan qaza tapqandar sany 45 adamǵa jetken. 1 kenshi jer astynda.
Ashyq derekkózderge súıensek, bul bolǵan qaıǵyly oqıǵa qurban bolǵandar sany boıynsha eń úlken oqıǵa boldy.
