Ortalyq kommýnıkasııalar qyzmetiniń alańyndaǵy baspasóz máslıhatynda QR Qorǵanys mınıstrligi Apparatynyń basshysy Erbol Qumarbekuly joba týraly aıtyp berdi.
«Osydan bir jyl buryn Qorǵanys mınıstri jetpiske jýyq joǵary oqý oryndarynyń basshylarymen memorandýmǵa qol qoıyp, áskerı qyzmetin úzdik ótkergen sarbazdar úshin joǵarǵy oqý oryndary esebinen tegin bilim alý múmkindigin berýge kelisken bolatyn. Bul múmkindikti Qarýly kúshterdiń ǵana emes, basqa da áskerı kúshterdiń sarbazdaryna da berýdi tapsyrdy. Árıne bastapqy kezeńde bul jobanyń iske asýyna kúmándanýshylar az bolǵan joq», - dep málim etti spıker.
Onyń aıtýynsha, sebebi joǵary oqý ornynda tegin oqý úshin joldama alǵan sarbazda Ulttyq biryńǵaı testileýdi tapsyrmaı, avtomatty túrde ótýi josparlanǵan.
«Degenmen bul jobanyń áskerı qyzmettiń bedelin arttyrýǵa baǵyttalǵanyn eskere otyryp, Ǵylym jáne joǵary bilim mınıstrligi ony qoldap, bıylǵy jyly kóktemde áskerı boryshyn támamdap sarbazdar arasynda irikteý ótip, UBT tapsyrmastan eń úzdik sarbazdar qoldaryna joldamalaryn alyp, 1 qyrkúıek kúni stýdentter qataryna qosyldy», - dep habarlady Erbol Qumarbekuly.
Osylaısha, bıylǵy jyly Otan aldynda áskerı boryshyn ótegen 3 myń azamatqa Qorǵanys mınıstrligi joǵary oqý oryndaryna tegin túsý úshin joldama berdi.
QR Qorǵanys mınıstrligi Apparat basshysynyń aıtýynsha, 2024 jyldan bastap merzimdi áskerı qyzmet etken azamattarǵa joǵary oqý oryndaryna túsý úshin memlekettik granttar bólinetin bolady.
«Bul maqsatta qazirgi ýaqytta tıisti memlekettik organdarmen jumys júrgizilý ústinde», - dedi ol.
