Biz shahtada eńbek etken jyldary qaýipsizdik sharalary qatań baqylanatyn. Shahtany, árbir ýchaskeni birneshe maman tekseretin. Jumys bastalǵannan aıaqtalǵanǵa deıin dıspetcherler qaýipsizdikti baqylap otyratyn. Ken salasyndaǵy kompanııalar eń birinshi kezekte jumysshylardy oılaýy kerek emes pe? Jaýapty mamandar ýchaskelerdi tyńǵylyqty tekseretin. Qatal qaraıtyn. Odan berige deıin qanshama ózgeris bolyp jatyr ǵoı. Birin bilsek, birin bile bermeımiz. Biraq beride eldegi birneshe shahtada jarylys boldy. Al buryn apatty jaǵdaılar sırek bolatyn. Qazir kóbeıip ketti. Qanshama kenshiniń otbasy qara jamylyp otyr. Jaqsy emes. Qaıǵyly oqıǵa kompanııanyń Kostenkodaǵy jumysshylardyń qaýipsizdigin qatań qadaǵalamaǵanyn kórsetti. Árkim óz isine jaýap berýi kerek. Tekserýshiler ýchaskeni teksergenin dıspetcherge únemi eskertip otyrýy qajet. Qazir qalaı ekenin bilmedim, bizdiń kezde júıe kúshti boldy. Jumysshylarmen keńesetin. Qaraý, baqylaý kóp boldy. Buryn bir shahtada qysqa-qysqa birneshe lava bolatyn. Qazir bir lava. Lavada metan gazy joıqyn jarylady. Betin aýlaq, tóńirekti joıyp, kúlin kókke ushyryp jiberedi. Gaz degen jylt etken ushqynnan jarylady. Kenshilerdiń otbasyna materıaldyq kómek kórsetiledi dep jatyr. Biraq adamdy qaıta tiriltip ákele almaısyń.
Jalpy, buǵan deıin de qansha jarylys boldy. Sabaq alatyn kez keldi ǵoı. Shegine jetti. Búıte berse shahtada jumys isteıtin adam qalmaıdy ǵoı. Buryn jalaqy, ústemeaqy, jeńildikter jaqsy beretin. Jumysshynyń eńbegi jaqsy baǵalanatyn. Qazir jeńildikter alynyp tastaldy. Sheteldik emes, óz kompanııalarymyz bolǵanda jumysshylardyń pikirine qulaq asyp, ymyrada jumys isteıtin edi degen oı keledi.
Baıaǵyda jumysshynyń quqy bastyqtan da joǵary bolatyn. Talap-aryzdaryn tike aıtatyn. Basshylar soǵan qulaq asatyn. Birinshi shahterlerge qaraılasatyn.
Basshylar shahtaǵa tússe, jaǵdaıdy túsiner edi. Iá, shahterlerdiń jaǵdaıyn aıtyp shyryldap júrgen depýtattar men belsendi azamattar boldy. Biraq ony tyńdaıtyn adam bolsa qane? Shahterdi tyńdasa, jaǵdaı mundaı bolmas pa edi?! Birinshi orynǵa tabys, kiris emes, jumysshynyń mártebesi, qaýipsizdigi tursa, mundaı jaǵdaıǵa jol berilmeıdi.
Alpys NURBEKOV,
ardager kenshi
