Balyq ósirýshilerge qoldaý bar

Bul derekter Túrkistan oblysynda balyq sharýashylyǵyn damytý, jas kásipkerlerdi yntalandyrý maqsatynda ótken «Balyqqa ómir syıla» atty respýblıkalyq forýmda keltirildi. Almaty oblysynyń «Balyq mektep» JShS, Túrkistan oblysynyń tabıǵı resýrstar jáne tabıǵat paıdalanýdy retteý basqarmasy uıymdastyrǵan forýmǵa 300-ge jýyq otandyq belsendi bız­­nes ókilderi men kásipkerler, tıis­ti basqarmalar men aýdan, qala ákimdikteriniń qyzmetkerleri qatys­ty. Forýmda oblys ákiminiń orynbasary Ermek Kenjehanuly Úkimettiń qaýlysymen 2030 jyl­ǵa deıin eli­miz boıynsha 270,0 myń tonna taýar­ly balyq ósirý baǵdarlamasy bekitil­genin eske saldy. «Memleket basshysy Qa­sym-Jomart Toqaev halyqqa arna­ǵan Joldaýynda elimizde balyq sharýashylyǵyn damy­tý­dyń mańyz­dylyǵyna toqtalyp, Úkimetke naq­ty tapsyrma júktegen edi. Prezı­dent tapsyrmasyna sáıkes, salany damytýdyń 2021-2030 jylǵa arnal­ǵan baǵdarlamasy qabyldanyp, júze­ge asyryla bastady. Baǵdarlama aıa­syn­da 2030 jyly oblysta balyq ósirý kólemin 20 myń tonnaǵa jetki­zý mejesi tur. Bıyl óńirde 6 640 ton­na taýarly balyq óndirý kózde­lip otyr. Búginde bul jospardy oryndaý baǵytynda naqty ju­mys­­tar júrgizilip jatyr», dedi Ermek Kenjehanuly.

О́ńirde jergilikti mańyzy bar 104 sý aıdyny tirkelgen. Onyń 84-i tabıǵat paıdalanýshylarǵa bekitilip berilgen. Balyq ósirý sektorynda 130-ǵa jýyq sharýashylyq jumys istep otyr. Oblystyń aýdan, qala ákimdikterinde  balyq sharýashylyǵyn damytýdyń 2023-2025 jyldarǵa arnalǵan is-shara jospary bekitilip, 250-ge jýyq balyq ósirý sharýashylyǵyn ashý josparlanǵan. Forým barysynda balyq sharýashylyǵy assosıasııasyn qurý boıynsha qarar qabyldanyp, salaǵa qatysty ózekti máseleler talqylandy. Jańadan qurylǵan qaýymdastyq oblystaǵy balyq sharýashylyǵymen aınalysatyn kásipkerlerge jan-jaqty kómek kórsetpek. Sondaı-aq forým aıasynda balyq ónimderiniń jármeńkesi uıymdastyrylyp, bıznes ókilderi men kásipkerler óz ónimderin usyndy, tájirıbe almasty. Sastóbe kóli men Shymkent qalasynyń aýmaǵynda ornalasqan Badam sý qoımasyna 100 myń dana tuqy balyǵynyń shabaqtary jiberildi.

Aıta keteıik, 2022-2023 jylda­ry Almaty oblysynda orna­las­qan «Balyq mektebin» oblys­tyń 76 kásipkeri bitirgen. Al Shar­dara aýdanyndaǵy «Hamıt» aýyl ón­diristik kooperatıvinde balyq ósirý boıyn­sha 86 kásipker bi­limin jetil­dirgen. Qazirgi ta­ńda kásipkerler ba­lyq ósirý sharýashylyǵyn qurýǵa qol­daý kórsetip júr.

Túrkistan oblysy