Úkimet basshysy 2024 jyly Ulttyq qordan bólinetin nysanaly transfertterdiń kólemi 1,6 trln teńgeni quraıtynyn atap ótti.
«Atalǵan qarajat áleýmettik mańyzy bar jáne strategııalyq ınfraqurylymdyq jobalardy qarjylandyrýǵa baǵyttalady», dedi Álıhan Smaıylov.
Sonymen qatar ol aldaǵy jyldary memlekettik bıýdjet kirisiniń ósýine baılanysty nysanaly transfertter kólemi azaıatynyn aıtty.
«Ol úshin biz tıisti ınvestısııalardy tartý jáne ekonomıkanyń naqty sektoryn qarjylandyrý máselelerin sheshetin bolamyz. Atap aıtqanda, bul shaǵyn jáne orta bıznesti, sondaı-aq agroónerkásip keshenin memlekettik qoldaýǵa qatysty», dedi Premer-mınıstr.
Onyń aıtýynsha, búginde Úkimet shıkizattyq emes sektordy qosa alǵanda, jalpy quny 32 trıllıon teńgeni quraıtyn 970 iri ınvestısııalyq jobany júzege asyrý boıynsha jumys júrgizýde.
Sonymen qatar «Tarıfti ınvestısııaǵa aıyrbastaý» baǵdarlamasy arqyly ınjenerlik ınfraqurylymdy jańǵyrtý boıynsha sharalar qabyldanatyn bolady, bul da el ekonomıkasynyń naqty sektoryn damytýǵa oń áserin tıgizedi.
«Kelesi jyly biz ekonomıkany 5,3%, odan ári keminde 6% deńgeıinde ósedi dep boljap otyrmyz. Bıýdjet kirisin arttyrý úshin ekonomıkany damytýǵa, salyqtyq ákimshilendirýdi jetildirýge jáne kóleńkeli ekonomıkaǵa qarsy kúreske basa nazar aýdaramyz. Biz atalǵan máselelerdiń barlyǵymen keshendi túrde aınalysatyn bolamyz», dep túıindedi sózin Álıhan Smaıylov.
