Premer-Mınıstrdiń orynbasary óz sózinde eki el arasyndaǵy syndarly dıalogti qurýdaǵy úkimetaralyq komıssııanyń tıimdiligin atap ótti.
Serik Jumanǵarın Reseı Qazaqstannyń iri saýda seriktesi ekenin, ótken jyldyń qorytyndysy boıynsha ekijaqty taýar aınalymy 9,5%-ǵa ósip, 27 mlrd dollarǵa jetkenin atap ótti. 2023 jyldyń qańtar-tamyz aılarynyń qorytyndysy boıynsha eki el arasyndaǵy saýda kólemi 17 mlrd dollardy qurady, bul ótken jyldyń sáıkes kezeńimen salystyrǵanda 1,1%-ǵa joǵary.
Búginde reseılik kompanııalar Qazaqstan ekonomıkasyna quıǵan qarjy kólemi boıynsha basty ınvestorlardyń bestigine kiredi, sońǵy 17 jylda reseılik ınvestısııalar aǵyny 19 mlrd dollardy qurady. О́z kezeginde Reseıge quıylǵan qazaqstandyq ınvestısııalar 5,6 mlrd dollardan asty.
Otyrysta taraptar kólik-tranzıt salasyndaǵy ózara is-qımyldy keńeıtýdiń mańyzdylyǵyn, onyń ishinde eki el aýmaǵy boıynsha tranzıttik tasymaldardy ulǵaıtýdyń, avtojol ınfraqurylymyn birlesip damytýdyń jáne Qazaqstan-Reseı shekarasyndaǵy ótkizý pýnktterin jańǵyrtýdyń mańyzdylyǵyn atap ótti. Otyrysqa qatysýshylar aýyl sharýashylyǵy salasynda eki eldiń veterınarlyq jáne fıtosanıtarlyq qadaǵalaý salasynda aqparattyq ıntegrasııalaý jónindegi jumysty jalǵastyrý qajettigine nazar aýdardy.
Reseı tarapy óz kezeginde sıfrlyq saladaǵy ózara is-qımyldy damytýǵa qyzyǵýshylyq bildirdi.
«Sıfrlandyrý salasyndaǵy Reseı-Qazaqstan yntymaqtastyǵynyń zor áleýetine senimdimiz. Aqparattyq tehnologııalar jónindegi komıssııa sheńberinde ózara is-qımyldy jalǵastyrýǵa úmittimiz. Búginde reseılik marketpleısterde shamamen 120 myń qazaqstandyq jetkizýshi tirkelgen jáne olardyń sany artyp keledi. Osylaısha eldiń logıstıkalyq ınfraqurylymy men jergilikti kásipkerlik damýda», dep atap ótti Alekseı Overchýk.
Otyrysta taraptar elektr qýaty jáne munaı-gaz salalaryndaǵy yntymaqtastyqty odan ári damytý josparlaryn talqylady, birqatar jańa bastamaǵa nazar qoıdy.
Áýe kóligi salasynda da Qazaqstan men Reseı ózara áýe qatynasyn keńeıtýge kelisti. Atap aıtqanda, taraptar «qazaq air» kompanııasynyń Novosibir men Chelıabi qalalaryna ushý sanyn arttyrýǵa ýaǵdalasty.
Jıynǵa qatysýshylar Reseı tarapynan aǵash materıaldaryn shyǵarýǵa shekteý sharalary týraly da másele qozǵady. 2024 jyldyń 1 qańtaryna deıin Qazaqstan-Reseı shekarasynda atalǵan ónimdi Qazaqstan Respýblıkasyna shyǵarý úshin taǵy 4 ótkizý beketin belgileý máselesin pysyqtaý týraly kelisimge qol jetkizdi.
Sonymen qatar reseılik tarap RF Úkimetiniń №312 qaýlysyna sáıkes qazaqstandyq kompanııalardyń menshigindegi jáne aýmaqqa ýaqytsha ákelinetin taýarlardyń jekelegen túrlerin áketýge ruqsat berý tártibin taratpaý múmkindigin qarastyrady.
Otyrys sońynda, Serik Jumanǵarın ekijaqty yntymaqtastyqtyń barlyq spektri boıynsha ózara is-qımyldy odan ári arttyrýǵa daıyn ekenin jetkizdi. Talqylaý qorytyndysy boıynsha taraptar úkimetaralyq komıssııanyń 24-otyrysynyń hattamasyna qol qoıdy.
