Úkimet basshysy qazirgi ýaqytta kásiporynda kenshilerdiń ólimine baılanysy tergeý júrgizilip jatqanyn eske saldy.
«О́tken jyldyń qarasha aıynda qaıǵyly oqıǵa saldarynan 4 shahter qaza tapqan bolatyn. Bul jaǵdaı boıynsha tergeý aıaqtaldy, jaýapkerler qazir materıaldarmen tanysyp jatyr. Jaqyn arada olar sotqa jiberiledi. Tamyz aıynda da qaıǵyly oqıǵa oryn alyp, taǵy 5 shahter qaza tapty. Ol boıynsha tergeý júrip jatyr, áli aıaqtalǵan joq. Sońǵy fakti boıynsha jan-jaqty tergeý júrgizilip, kináli adamdardyń barlyǵy jaýapqa tartylady», dedi Álıhan Smaıylov.
Onyń sózinshe, Úkimettiń jýyq aradaǵy mindeti – bul kompanııanyń Qazaqstan Respýblıkasyna qaıtarylýyn qamtamasyz etý.
«Kásiporyndaǵy jalaqy men jumys oryndarynyń saqtalýy, barlyq áleýmettik mindettemeniń, onyń ishinde kenshiler qaza bolǵannan keıin týyndaǵan mindettemelerdiń oryndalýyn qamtamasyz etý. Olardyń tolyq oryndalýyn qadaǵalaıtyn bolamyz», dedi Premer-mınıstr.
Úkimet basshysy kompanııany Qazaqstan Respýblıkasyna qaıtarý týraly aldyn ala mámilege sáıkes, onyń egjeı-tegjeıin jarııa etýge bolmaıtynyn aıtty.
«Ol týraly mámile aıaqtalǵannan keıin, bir aıdyń ishinde habarlanady. 30 qarashaǵa deıin qaıtarýdyń barlyq zańdy rásimin aıaqtaýymyz kerek», dedi Álıhan Smaıylov.
Qorytyndylaı kele Premer-mınıstr memlekettiń «ArselorMıttal Temirtaý» AQ-nyń menshik ıesi bolý jáne oǵan bıýdjet qarajatyn bólý jospary joq ekenin atap ótti.
«Biz aldaǵy 3 jylda keminde 3 mlrd dollar ınvestısııalaýǵa daıyn jeke ınvestordy tartýymyz kerek. Onyń shamamen 1,3 mlrd dollaryn birden quıý qajet, óıtkeni kásiporyndaǵy qazirgi jaǵdaı ónerkásiptik qaýipsizdik pen jabdyqty jańǵyrtý máselelerin tez arada sheshýdi talap etedi. Bul qazaqstandyq ınvestor bolady dep josparlap otyrmyz», dep túıindedi ol.
