Á.Smaıylov Prezıdenttiń Jarlyǵymen Memlekettik qarjyny basqarýdyń 2030 jylǵa deıingi arnaıy tujyrymdamasy bekitilgenin atap ótti.
«Mundaı keshendi qujat alǵash ret qabyldanyp otyr. Onda qarjyny basqarý, onyń ishinde memlekettik qaryzdy basqarý boıynsha qatań mindettemeler belgilengen. Úkimet olardy ustanatyn bolady», dedi Premer-mınıstr.
Premer-mınıstrdiń aıtýynsha, Úkimet Qazaqstannyń boryshtyq mindettemelerin azaıtý boıynsha birqatar shara qabyldaýda. Birinshiden, bıýdjet tapshylyǵyn azaıtý kózdelip otyr.
«Sońǵy ýaqytta bıýdjet tapshylyǵy IJО́-ge shaqqanda shamamen 3% boldy. Bıyl tapshylyq IJО́-ge shaqqanda 2,7%-ǵa deıin tómendedi, odan ári 2026 jylǵa qaraı kórsetkish 2,3%-ǵa deıin jetkizilmek. Bul jańadan qaryz alýdy shekteýge jáne qaryzdyń ósý qarqynyn tómendetýge múmkindik beredi», dedi Álıhan Smaıylov.
Ekinshiden, memlekettik bıýdjettiń kiristerin ulǵaıtý kózdelip otyr. Ol úshin salyqtyq jáne kedendik ákimshilendirýdi sıfrlandyrý jónindegi jumys jalǵasatyn bolady.
«Úshinshiden, Qarjy mınıstrliginiń baǵaly qaǵazdaryn halyqaralyq ındeksterge qosý kózdelgen. Bul qaryz alý qunyn jáne sáıkesinshe qaryz boıynsha qyzmet kórsetý shyǵyndaryn azaıtý úshin qor naryǵyna halyqaralyq ınvestorlardy tartýǵa múmkindik beredi», dedi Premer-mınıstr.
Álıhan Smaıylov Úkimet artyq valıýtalyq táýekelderdi joıý jáne qaryz boıynsha qyzmet kórsetý shyǵyndaryn odan ári azaıtý úshin kóbine ishki naryqta qaryz alý saıasatyn qabyldaǵanyn aıtty.
«Osy sharalardyń barlyǵyn biz Úkimette turaqty túrde talqylap kelemiz. Barlyq mindettemeniń saqtalýyn qadaǵalap otyrmyz. Jańa Bıýdjet kodeksi aıasynda Parlamentke qaryzdy basqarý boıynsha taldamalyq aqparat usynýdy josparlap otyrmyz», dep túıindedi Álıhan Smaıylov.
