Kómirli qalanyń jylý júıesindegi apattyń oryn alǵanyna jylǵa jýyq ýaqyt ótse de, qańtardyń aıazy ótip ketken jurttyń boıy áli jylyna qoımady. Kópqabatty baspanalardy ortalyq jylýǵa qosý sharalary qazan aıynyń basynda bastalǵan. Áıtse de jergilikti ákimdik pen jylý-energııa ortalyǵy, jylý jelilerine jaýapty kásiporyn máseleni túbegeıli sheshe almaı turǵany baıqalady. Páterinde jaýraǵan jurt qos-qostap jylytqysh qosyp, qalyń kıim kıip jan saqtaýda. Buǵan deıin №19 shaǵyn aýdanyndaǵy jańa úılerde másele qalyptasyp otyrǵany týraly jazǵan edik. Aýmaqtaǵy túıtkil tolyqqandy sheshimin tappaǵan syńaıly. Qazir qalanyń ár aýmaǵynda jalpy sany 20-ǵa jýyq turǵyn úıde problema qalyptasqan.
Al jergilikti ákimdik ókilderi páterlerdiń sýyq bolýyna turǵyndardyń ózderi sebepker, jylý jelisindegi aýany shyǵarmaıdy, radıatorlardy ýaqtyly jýmaıdy dep kiná artyp otyr.
– Qazirgi ýaqytta kópqabatty 10 úıde jylý jetispeýshiligi aıqyndalyp, olardy joıý boıynsha is-sharalar atqarylyp jatyr. Jergilikti jerlerde aqaý shyǵa qalsa, «Ekibastuz jylý-energo» JShS men merdiger kompanııalardyń jáne qalaquraýshy kásiporyndardyń qyzmetkerlerinen quralǵan arnaıy jóndeý brıgadalary iske kirisedi. Jylý maýsymy bastalǵaly jylý sapasy men onyń múlde joǵalyp ketýine baılanysty azamattardyń shaǵymyna qulaq asyp, turǵyn úı ınspeksııasy men jylý jelileriniń ókilderi 40-taı máseleni sheshti. Negizi qala tolyqtaı ortalyq jylýmen qamtylǵan. Bul jerdegi másele úılerdiń ishki júıelerine qatysty bolyp otyr. Úılerdiń daıyndyǵy nashar bolǵan. Áıtpese qaladaǵy 690 turǵyn úı men jeke sektordaǵy 5 737 baspana jylý júıesi men ystyq sýǵa 100 paıyz qosyldy, – deıdi qala ákiminiń orynbasary Ánýarbek Amanov.
Mamandar kóptegen úıdiń ishki qubyrlaryn rettep, aýasyn shyǵarý kerek dep sanaıdy. Alaıda jurtshylyq ákimdik pen jylý kásipornynyń ókilderiniń syltaýy kóp, negizgi túıtkil ortalyq magıstraldarda dep otyr. Iаǵnı jylý parametrleri talapqa saı emes, qysymy tómen, aınalymy álsiz. Onyń ústine biraz úılerde ystyq sý oqtyn-oqtyn toqtap qalady. Sondyqtan ákimdiktiń joǵaryda aıtqan júz paıyz kórsetkishi eshbir oıǵa syımaıtyndaı. Al jylý-energııa ortalyǵyndaǵy jylý tasymaldaǵyshtyń parametrleri qalypty, ıaǵnı kásiporynnan shyǵatyn sýdyń temperatýrasy – 70, aınalyp keletin sýdyń qyzýy 50 gradýsty kórsetip tur. Ázirshe qalany 5 qazandyq agregaty jylýmen qamtamasyz etip otyr. Jýyq ýaqytta jóndelip jatqan taǵy 3 qazandyq iske qosylady.
Sýyq úılerdegi jylý parametrleri qashan tolyq retke keltiriletinin ákimdik ókilderi de, jylý kásiporny da aıta almaıdy. Sebebi jylý parametrlerin teńestirýge áli de biraz ýaqyt qajet kórinedi. Aldaǵy qys ekibastuzdyqtar úshin jaıly bolsyn dep tileımiz.
Pavlodar oblysy,
Ekibastuz qalasy
